Undunankulu waseKZN ukhala ngabavuse izinkampani eziphula umthetho ngabantu bokufika abangenagunya
YINTATHELI YOMBELE
NGEMVA kokufika kwezinye izinkampani eziphula imithetho kahulumeni yokuqasha izisebenzi ngokusemthethweni, undunankulu waKwaZulu-Natal uMnu uThami Ntuli uthi kuzophenywa ngabantu abaphazamise umkhankaso wokuhlola ukuthi izinkampani zihlonipha imithetho yokuqasha abantu bokufika KwaSithebe, eMandeni, ogwini olusenyakatho, izolo.
Kubikwa ukuthi izolo izinkampani zakule ndawo zigodukise izisebenzi ngaphambi kokufika kwabahloli. Lo mkhankaso ubuholwa ngamaphoyisa, umNyango wezaseKhaya nezikhulu zomNyango weziSebenzi ngemva kwemibiko ethi bangaphezu kwa-400 abantu bokufika abangenazimvume zokuqashwa.
Isifundazwe sinomkhankaso, oholwa wundunankulu, “i-Operation Engangeni Ngesango Iyafohla”, ogxile ekuhloleni amabhizinisini aphula imithetho yokusebenza nelawula abantu bokufika.
FUNDA NALAPHA: https://www.umbele.co.za/2026/06/11/abantu-baseningizimu-afrika-ababazondi-abokufika-ingqapheli/
Inhloso enkulu yalo mkhankaso wukulwa nokungena ezweni kwabantu bangaphandle ngokungemthetho, ukubopha abantu bokufika abangenazimvume zokusebenza, ukuphoqa amabhizinisi ukuhambisana nomthetho ngokuvala lawo aqasha abantu abangenazimvume, adayisa ukudla okuphelelwe yisikhathi noma izinto ezingekho emthethweni, ukuvikela amalungelo ezisebenzi njengokubaholela imali engaphansi komholo omncane ogunyaziwe noma ezisebenzisa abantu ezindaweni ezingaphephile. Le mikhankaso ibhekiswe ezindaweni zezimboni namanye amabhizinisi eMgungundlovu, eThekwini naseMandeni.
UNtuli uthe ukhathazekile ngokuthola ukuthi kunabantu abapotshole izinkampani eziphula umthetho ukuthi kuza uhulumeni, abahloli namaphoyisa. Wengeze ngokuthi uSepthemba uzobayinyanga yokuqinisa lo mkhankaso. Uhulumeni wesifundazwe uSepthemba uzobayinyanga yokuqinisa imikhankaso nokugasela ezifundeni ezihlukene.