Umasipala ubambisene nomNyango wamaBhizinisi amaNcane ezweni ukususa izithiya kosomabhizinisi
YINTATHELI KAMASIPALA
EMIZAMWENI yokuseka amabhizinisi endawo, uMasipala waseThekwini ubambisene nomNyango wamaBhizinisi amaNcane usanda kwenza uhlelo lokuvakashela osomabhizinisi abancane i-Ministerial Outreach Programme.
Kulo mcimbi, obungoLwesihlanu oludlule, ungqongqoshe womNyango wamaBhizinisi amaNcane uNksz uStella Ndabeni, uhambe nosihlalo weKomiti lokuThuthukisa umNotho nokuHlela kuMasipala waseThekwini uMnu uThembo Ntuli baya emabhizinisi aseThekwini.
Inhloso bekuwukuqinisekisa ukuthi azikho izithiyo ezinqinda osomabhizinisi ukuthola usizo olufanele ukuze bakwazi ukuhweba.
FUNDA NALAPHA: https://www.umbele.co.za/2025/10/31/ingqalasizinda-yamabhizinisi-amancane-izophuculwa-ngor370-million/
Echaza ngokubalulela kokusebenzisana phakathi kosomabhizinisi abancane nohulumeni uNksz uNdabeni uthe: “Amabhizinisi amancane yiwona asekhaleni lokudala imisebenzi nokuqinisekisa ukuthi akekho osala ngaphandle emnothweni. Ngalezi zinhlelo uhulumeni akagcini ngokuthola izithiyo ezivimba osomabhizinisi kodwa usondeza usizo oluzoqinisekisa ukuthi bayaphumelela, bakhiqiza kakhulu, bancintisana kahle futhi amabhizinisi abo akawi.”
Amabhizinisi athole nezinsizakusebenza ezizowasiza ukukhiqiza. Ngohlelo i-Asset Assist Programme amabhizinisi amancane awu-31 athole imishini yokusebenza ebiza uR6,3 million ohlelweni i-Cooperative Development Support Programme, amabhizinisi amane ayimfelandawonye athole usizo lukaR10,9m oluzoqinisekisa ukuthi aneqhaza elibonakalayo emnothweni waseThekwini.
UNtuli uthe umasipala uzibophezele ukukhulisa amabhizinisi amancane. “Kuwumsebenzi wethu siwumasipala ukuqinisekisa ukuthi osomabhizinisi bayakwazi ukukhula besuka ekupataniseni babenamabhizinisi avulela abanye amathuba.
“Izinhlelo ezinjengalezi zikhombisa esingakwenza ukususa izithiyo uma uhulumeni wendawo usebenzisana nowezwe ukusiza osomabhizinisi ukusimamisa umnotho.”
Ngokuhlanganisa inqubomgomo eletha usizo itshale nemali emabhizinisi, umasipala uyaqhubeka nokuqinisekisa ukuthi uyindawo egqugquzela ukukhula kwamabhizinisi, ewavumela ukusebenza, ukudala imisebenzi yesikhathi eside nokukhulisa umnotho ofaka wonke umuntu.