Kuqopheke umlando owesifazane ethatha amatomu okuhola iBlack Management Forum Investments

INTATHELI YOMBELE

I-BLACK Management Forum Investments (iBMFI) iqoke uNks uRamona Grewan ukuthi abewusihlalo webhodi yayo. Uwumuntu wesifazane wokuqala kulesi sikhundla emlandweni weminyaka ewu-30 wale nkampani.

I-IBMF yasungulwa ngo-1996 ukuthi ibewuphiko lokutshala imali lweBlack Management Forum, inhlangano engenzi nzuzo ekhuthaza ubuholi babantu abamnyama emabhizinisini aseNingizimu Afrika.

Le nkampani itshala imali ngenhloso yokuthola inzuzo iphinde igqugquzele uguquko. Ngokwe-Enterprise Africa, umcebo wayo ulinganiselwa kuR650 million kanti inamasheya ezinkampanini okubalwa kuzona iComputershare, iCable Tapes Africa, iRosslyn Development Hub neStrategic Partners Group.

Inamasheya ezinkampanini ezisohlwini lwezimakethe zamasheya, okubalwa kuzona iNedbank, iRaubex ne-ADvTECH. I-Sanlam inamasheya awu-30% eBMFI kanti le nkampani izibekele umgomo wokukhulisa umcebo wayo ufinyelele kuR1 billion.

FUNDA NALAPHA: https://www.umbele.co.za/2026/09/07/imbokodo-ewumakadebona-iqokelwe-kwibhodi-yemr-price/

I-IBMF Investments ithe uNks uGrewan ufika kwibhodi namava eminyaka engaphezu kwewu-20 obuholi bamasu, ukuphatha ngendlela efanele, ezomthetho nombono wamazwe omhlaba.

Ukuqokwa kukaNks uGrewan kwenzeka ngesikhathi izinkampani ezisohlwini lwezimakethe zamasheya nezingekho kuzo eNingizimu Afrika zisacindezelwa ukuthi ziphucule ukuholwa ngabantu besifazane kumabhodi.

UNks uGrewan useke wayisikhulu emkhakheni wohulumeni, uyisifundiswa sezomthetho nongoti kwezobudlelwano namazwe aphesheya. Uke waphatha emikhakheni okubalwa kuyona ingqalasizinda, ukuqasha abantu, ukuphatha izimali nokuxhumana nabalingani.

Une-Master’s yezomthetho wamazwe aphesheya nezokuxhumana namazwe aphesheya zase-University for Peace, i-LLB yase-University of South Africa nezitifiketi  zobuholi.