Umasipala wethule isikhungo senhlalakahle ukukhuthaza izisebenzi nezinga eliphezulu
INTATHELI KAMASIPALA
UMASIPALA waseThekwini uthathe igxathu elinqala emkhankasweni wokuqinisekisa ukuthi uhlinzeka umphakathi ngosizo olusheshayo, lobuchwepheshe nolunobuntu ngokuvula iSINAWE Wellness Centre.
Lesi sikhungo sesimanje sakhelwe ukuphucula inhlalakahle yezisebenzi zikamasipala ukuze ziwenze kangcono umsebenzi wazo. Lo mkhankaso ufakazela inkolelo kamasipala ethi izisebenzi ezinakekelwayo zenza umsebenzi osezingeni eliphezulu wokusiza umphakathi nokuthi ukutshala kwizisebenzi kusho idolobha elisebenza kahle, elinakekelayo nelazi umsebenzi.
Lesi sikhungo sikaNokusho sise-350 Montpelier Road eMorningside, ngaphesheya kweMitchell Park Zoo.
FUNDA NALAPHA: https://www.umbele.co.za/2026/01/23/umasipala-wasethekwini-uphucula-ezakwandabazabantu/
Ekhuluma egameni lemeya yaseThekwini uMnu uCyril Xaba, usihlalo weKomiti lokuPhatha nakwaNdabazabantu uMnu uNkosenhle Madlala ukuthula lesi sikhungo kuyingqophamlando yoshintsho lokwakha izisebenzi eziphilayo nezenza umsebenzi osezingeni eliphezulu.
“Le ngqophamlando emqoka ikhombisa ukuzibophezela kukamasipala ukwakha izisebenzi ezinempilo, ezibekezelayo nezenza umsebenzi osezingeni eliphezulu.
“Lo msebenzi ufakazela ukuthi izisebenzi zethu ziyigugu elikhulu kithina nokuthi impilo yazo emzimbeni, emphefumelweni nasengqondweni imqoka ekwenzeni umsebenzi osezingeni eliphezulu,” kusho yena.
ISINAWE Wellness Centre iyingxenye yohlelo lukamasipala lokusungula izikhungo zempilo ezindaweni ezihlukene ukuqinisekisa ukuthi izisebenzi zawo zithola usizo lwezempilo olusezingeni eliphezulu ngisho noma ngabe zikuphi.
Umqondisi woPhiko lakwaNdabazabantu uMnu uSihle Mkhize unanele ukuthi impilo yezisebenzi iyinsika yokuqinisekisa ukuthi umasipala uhlinzeka umphakathi ngezidingo ezisezingeni eliphezulu.
“Ngokubeka phambili impilo yezisebenzi asigcini nje ngokushintsha impilo yabantu kodwa sandisa amandla ethu okusiza umphakathi kangcono.
“Izisebenzi eziphilayo zisho ukusebenza kangcono nokuhlinzeka umphakathi ngezidingo kangcono. Uma sitshala kwizisebenzi zethu siqinisa isisekelo sikamasipala osiza izakhamuzi ngendlela enesithunzi nozwelo,” kuphetha yena.