UmNyango weziMali uyosiza izisebenzi zikahulumeni za‘mazwe ayezimele’ ngezimpesheni
INTATHELI YOMBELE
UNGQONGQOSHE womNyango weziMali uMnu u-Enoch Godongwana uzovakashela eMthatha, eMpumalanga Kapa, kusasa ukuyohlangana nezisebenzi zikahulumeni ezazisebenzela ohulumeni baseTranskei, eBophuthatswana, eVenda naseCiskei ezinenkinga ngemihlomulo yezimpesheni zazo.
Lo mkhankaso wokusiza izisebenzi, owenziwe ngokubambisana neGovernment Pensions Administration Agency (iGPAA), uzohlinzeka izisebenzi zohulumeni bezabelo ngolwazi nosizo, okubalwa kulona ukuqinisekiswa kwamarekhodi okusebenza kwazo nemali eyayibanjelwa impesheni.
Loku kuhambisana nokuzibophezela komnyango ukusiza izisebenzi zikahulumeni esezathatha umhlalaphansi kodwa ezinenkinga yemihlomulo yempesheni.
Ngesikhathi kusukwa kuhulumeni wobandlululo kuyiwa embusweni wentando yabantu ngo-1994, izisebenzi zalaba ohulumeni bezabelo zangena ngaphansi kweGovernment Employees Pension Fund (iGEPF). Nakuba eziningi zakwazi ukuthola impesheni yazo kodwa ezinye azikwazanga ukuqinisekisa amarekhodi omsebenzi azo, imali yempesheni eyayibanjwa emholweni neminye imicikilisho.
Ngemva kokungena ngaphansi kweGEPF, imihlomulo yezinye izisebenzi yancishiswa kakhulu. Loku kwenzeka ngenxa yokuthi kwabalwa imihlomulo kusukela ngemva kwango-1996 esikhundleni sokubala neminyaka zisasebenzela ohulumeni bezabelo.
Ngemva kwale ngqinamba kwasungulwa ikomiti elididiyele umNyango weziMali, umNyango weziSebenzi zikaHulumeni nekomiti likahulumeni nezabelo iJoint Task Team, elathola ukuthi izikhwama zempesheni ezizimele, okubalwa kuzona iSanlam ne-Alexander Forbes, ziyayibona le mihlomulo nokho kwavimba iminqamlajuqu eyayibekiwe, okumanje iPhalamende liyayibuyekeza.
Lolu hambo lukangqongqoshe nezikhulu zesikhwama sempesheni luhlose ukulekelela lezo zisebenzi zikahulumeni ezithintekayo. Ngalolu suku izisebenzi zeGPAA zizoqinisekisa amarekhodi mathupha. Lo mkhankaso wokuxhumana nokusiza abanikazi bendaba mathupha uhlose ukuqinisekisa ukuthi izisebenzi zikahulumeni ezazisebenza kula mazwe ayezabelo zikahulumeni wobandlululo zithola imihlomulo yezimpesheni zazo.
Kuzoqalwa ngo-10 ekuseni, kuya ku-1 emini kanti usizo luzotholakala e-OR Tambo Municipality Hall, Old Government Printers Building, e-5 Textile Road, eVulindlela Heights, eMthatha.