I-Durban Tourism ixhase amabhizinisi awu-24 ngezinto zokusebenza
YINTATHELI KAMASIPALA
I-DURBAN Tourism ifakazele ukuzibophezela kwayo ukusimamisa umkhakha wezokuvakasha nokuxhasa amabhizinisi endawo akulo mkhakha awu-24 ngezinto zokusebenza zenani eliwuR720 000 aphuma isibili nesithathu kuma-5th Durban Tourism Business Awards, ayengoJuni wango-2026.
Abaphume phambili emikhakheni yabo bathola imiklomelo yabo emcimbini owawungoJuni. Ukudluliswa kwezinto zokusebenza, obekuhambisana nomkhankaso kaMasipala waseThekwini wokuklomelisa nokuxhasa izinga eliphezulu emkhakheni wezokuvakasha, kuphothule umsebenzi wokukhipha imiklomelo, ngenkathi abaphume abalandela abaphuma phambili bethola izinto zokusebenza ezihambisana nezidingo zomsebenzi wabo.
Ezintweni zokusebenza kubalwa izinto zikagesi, ifenisha, izinto zasehhovisi nezinye izinto zokusebenza ezimqoka, kuye ngezidingo zebhizinisi ngalinye. Lolu sizo luzokwenza kubelula ukusebenza emabhizinisini, kuphucule indlela asebenza ngayo futhi kwenze akwazi ukusebenzela endaweni azosimama kuyona futhi abeneqhaza emnothweni wezokuvakasha waseThekwini.
FUNDA NALAPHA: https://www.umbele.co.za/2026/03/20/sesifikile-isikhathi-samadurban-tourism-awards/
Usihlalo weKomiti lokuThuthukisa nokuHlela umNotho kumasipala uMnu uThembo Ntuli uthe umasipala uyalibona igalelo elibalulekile lamabhizinisi ezokuvakasha asungula izinto ezintsha ekusimamiseni imboni yezokuvakasha eThekwini.
Uthe: “Ukuphumelela kweTheku njengendawo eheha izivakashi kuhambisana namandla, ukuphokophela nokuqhudelana kwamabhizinisi nabantu abasebenza emkhakheni wezokuvakasha. Ukukhipha lezi zinto zokusebenza kusho ukuqinisekisa ukuthi amabhizinisi ezokuvakasha ethu anezinsizakusebenza zokusebenza nokusimama.”
Wengeze ngokuthi ukuxhasa amabhizinisi ezokuvakasha kumqoka ukwakha umnotho wezokuvakasha osimeme novulela amabhizinisi endawo nemiphakathi amathuba.
Abahlomulile baluthakasele lolu sizo, babalula ukuthi zinto zokusebenza abazitholile zizobasiza ukubhekana nezinye zezinselelo ababhekana nazo ekusebenzeni nasekukhuliseni amabhizinisi abo.
Umsunguli weThe Lazy Moose, neyaphuma isibili emkhakheni i-Green and Sustainable, uMnu uLuke Murgatroyd uthe izinto zokusebenza ezitholwe yibhizinisi lakhe zizolekela ukuphucula ukusebenza futhi zixazulule izinselelo zokusebenza.
AmaDurban Tourism Business Awards ayaqhubeka nokubayindawo yokunika amabhizinisi ithuba lokubonakalisa ngeqhaza elihle analo emkhakheni wezokuvakasha nokugqugquzela ukwenza izinto ngendlela entsha, umsebenzi osezingeni eliphezulu noguquko kule mboni.
Ngemikhankaso enjengale miklomelo nokuxhasa ngezinto zokusebenza, umasipala uqinisa ubudlelwano nemboni ezimele nokuhlomisa amabhizini ezokuvakasha ukuthi asimame futhi abeneqhaza ekusimamiseni idolobha njengendawo yokuvakasha esezingeni lomhlaba.