Asimile Siyaqhuba: Iminyaka emihlanu sihlomisa abaholi bakusasa
INTATHELI KAMASIPALA
UMASIPALA waseThekwini ubeke ukuthuthukisa intsha eqhulwini ngomsebenzi weHhovisi lokuThuthukisa iNtsha, eliseHhovisi leMeya.
Ukuqhakambisa umsebenzi wokuhlomisa intsha yaseThekwini kunomkhankaso obizwa nge-Five-Year Service Delivery Milestones onendikimba ethi “Asimile Siyaqhuba: Resilience Through Adversity”, okusho ukuphokophela ebunzimeni.
Lo mkhankaso uqhakambisa umsebenzi wokuguqula izimpilo zentsha owenziwe kusukela ngo-2021 kuya ngo-2026.
FUNDA NALAPHA: https://www.umbele.co.za/2026/07/03/asimile-siyaqhuba-iminyaka-emihlanu-yokuvuselela-imboni-yabahwebi-bamatafula/
IHhovisi lokuThuthukisa iNtsha liyaqhubeka ukubaneqhaza elimqoka ekuhlomiseni intsha ngokwempilo, okwemfundo nangokomnotho. Ngezinhlelo eziningi, leli hhovisi libumba isizukulwane sezakhamuzi ezizithembayo, ezinamakhono nezizimele.
Eminye yemikhankaso ebalulekile yaleli hhovisi wumcimbi wokuklomelisa abafundi abaphase kahle uMatikuletsheni ama-Matric Awards Ceremony, obakhona njalo ekuqaleni konyaka. Lo mcimbi uklomelisa abafundi baMatikuletsheni baseThekwini abaphase kahle.
Lo mkhankaso uklomelisa abafundi abavelele abawu-20, okungabayishumi abaphase ngamalengiso nabanye abayishumi basezikoleni ezintulayo. Abafundi abavelele abawu-20 bathola umfundaze ogcwele wokuyofunda enyuvesi abayithandayo yaseNingizimu Afrika kunoma yimuphi umkhakha. Umasipala utshala cishe uR1 million njalo ngonyaka ukufundisa laba bafundi.
Ngohlelo i-Back-to-School Programme, iHhovisi eliThuthukisa iNtsha lilekelela abafundi abantulayo ngokubahlinzeka ngezidingongqangi zemfundo ezimqoka.
Ngalolu hlelo abafundi bahlinzekwa ngama-calculator, ama-mathematical set, izicathulo zesikole, izishuqulwana zokugeza, nemisubelo yamantombazane. Ngonyaka wezimali u-2025/26, kuhlomula abafundi abangaphezu kwabawu-1 500 basezikoleni eziwu-30.
Ama-calculator, ama-mathematical set, izicathulo, izinto zokugeza nemisubelo kwe-Back-to-School Programme
Leli hhovisi linesikhwama i-Student Relief Fund esilekelela abafundi abafanele ngezindleko zokubhalisa nokuqala ezikhungweni zemfundo ephakeme. Ngonyaka wezimali u-2025/26 lolu hlelo luhlinzekwe cishe ng R1.3m.
Njalo ngoJuni, okuhambisana nemigubho yeNyanga yeNtsha, iHhovisi lokuThuthukisa iNtsha lenza umqhudelwano i-Business Challenge ehlose ukuxhasa osomabhizinisi abayintsha abanamabhizinisi asesebenze ngaphezu konyaka. Umasipala nabaxhasi bahlinzeka ngama-voucher ezinsizakusebenza zamabhizinisi zokuwalekelela ukuthi asimame.
Kulolu hlelo, osomabhizinisi abathathu abavelele baxhaswe ngezinsiza zebhizinisi zangoR70 000 zizonke, kwathi abawu-17 babelana ngezinsiza ezilinganiselwa kuR170 000.
I-Youth Talent Show wuhlelo lwaminyaka yonke oludala amathuba okuthi intsha iqhakambise amakhono obuciko ayo. Ngale nkundla, abantu abashaba bayahlangana ukukhombisa amakhono abo emikhakheni ehlukene, kuthi onqobile abeyi“nxusa” leHhovisi lokuThuthukisa iNtsha.
Phakathi nonyaka iHhovisi lokuThuthukisa iNtsha lenza izinhlelo ezihlukene zokuhlomisa intsha okubalwa kuzona imiqhudelwano yezemidlalo, ukululeka ngemikhakha yemfundo, izinhlelo zokucija abaholi, izigcawu zokuhlomisa ngolwazi nemisebenzi yokuthuthukisa umphakathi.
Imenenja yeHhovisi lokuThuthukisa iNtsha kumasipala uNks uNokuthula Hlophe uthi lezi zinhlelo zinamandla okuqinisekisa ukuthi intsha ihlonyiswa ngezinto namathuba okuphumelela.