Asimile Siyaqhuba: iminyaka emihlanu yokuvuselela imboni yabahwebi bamatafula
INTATHELI KAMASIPALA
UMASIPALA waseThekwini uyaqhubeka nokuqhakambisa umsebenzi wawo weminyaka emihlanu wokuhlinzeka umphakathi obizwa nge-Five-Year Service Delivery Milestonesonendikimba ethi “Asimile Siyaqhuba: Resilience Through Adversity”, okusho ukuphokophela nasebunzimeni.
Namuhlanje sibheka umkhakha wabahwebi abanamatafula, oyinsika ekukhuliseni umnotho wendawo, ukuvula amathuba okuziphilisa nokufukula osomabhizinisi abancane basemgwaqweni, ezimakethe nasezindaweni zokuhwebela.
Eminyakeni emihlanu edlule, umNyango woHwebo lwabaHwebi basemGwaqweni kumasipala, ngaphansi koPhiko lokuThuthukiswa umNotho, usebenze ngokuzikhandla ukuqinisa ukuxhumana phakathi komnotho ohlelekile nowabahwebi basemigwaqweni nasezimakethe.
Umgomo uqinisekise ukuthi abahwebi basebenza ezindaweni eziphephile, ezingabizi, ezinakekelwayo futhi eziheha amakhasimende. Kuloku bekukhona ukubheka izindawo zokuhweba ezinamathuba amahle, ukwakha ingqalasizinda entsha, ukuvuselela ekhona nokuhlela izivumelwano zokuqashisa nezimvume zokusebenza.
FUNDA NALAPHA: https://www.umbele.co.za/2026/07/02/asimile-siyaqhuba-sekuphele-iminyaka-emihlanu-kwakhiwa-izindawo-zokuhlala-ezinesithunzi/
Ngaphezu kwengqalasizinda, lo mnyango uqhubeke nokuxhasa abahwebi ngamathuba okuthuthukisa amakhono nokunakekela izindawo zokusebenza ukuze abahwebi bakwazi ukugxila ekukhuliseni amabhizinisi abo, ukondla imindeni nokudala amathuba omsebenzi. Ukutshala imali kulezi zindawo bekuseqhulwini kulo mkhankaso.
Ngonyaka wezimali wango-2023/24, imisebenzi emikhulu ixhase abahwebi abawu-636 futhi yadala amathuba emisebenzi awu-124 kuzo zonke izindawo eThekwini. Ukuvuselela ibhlidi i-126 Johannes Nkosi Building kuhlomulise abahwebi abawu-250 futhi kwadala imisebenzi ewu-18.
Ukulungisa umonakalo wezikhukhula e-Illovo Auto Hub nase-eMahawini Business Support Centre kusize abahwebi abawu-51, kwadala imisebenzi ewu-18. Ukuphucula i-64 Flower Road ne-uMlazi V Container Park sekukonke kusize abahwebi abawu-84, kwaphinde kwengeza amathuba emisebenzi awu-26.
Loku kutshala imali luqhubeke nokuvula amasango amasha kubahwebi abaningi, luqinisa indawo yomkhakha wohwebo olungahlelekile emnothweni wedolobha.
Kuphinde kwakhiwa izindawo zokuhweba ezintsha eBlue Lagoon naseCornubia Traders Facility, ezavulwa ngo-2025. IFolweni Traders Hub neMidway Mall Container Park zihlinzeke izindawo zokusebenzela abahwebi abawu-153, kanti le misebenzi idale amathuba omsebenzi awu-50.
I-Centrum Park Trading Hub, engaseThe Workshop, yavulwa ngo-2024 kanti imumatha abahwebi abawu-500. Ukuyivula kwaba yisinyathelo esibalulekile emsebenzini wokuhweba enkabeni yedolobha, ngokuvula indawo ehlelekile yokusebenza nokuthuthukisa ukuhambisana nemithetho kamasipala.
Khonamanjalo, iTara Road Building ivuselelwe ukuze isetshenziswe ngabahwebi nemisebenzi yezimakethe, kwahlomula abahwebi abawu-98, kwadaleka imisebenzi ewu-12.
Ukulungisa iVerulam Market kuhlomulise abahwebi abawu-507, kwadala imisebenzi ewu-15, kanti iPhoenix Market isize abahwebi abawu-132, yadala imisebenzi eeu-13.
Eningizimu yedolobha, i-Ezimbuzini Market ihlomulise abahwebi abawu-191 futhi yadala amathuba omsebenzi ayishumi. Ngale kwengqalasizinda, lolu hlelo lucije abahwebi ukuthi bakwazi ukubhekana nezikhathi ezinzima. Kusukela ngoJulayi wango-2021 kuya kuDisemba wango-2022, abahwebi bezimakethe abashaywa yi-Covid-19 nezibhelu zenhlalo nomnotho bathola ukukhululwa ekukhokheni irenti okulinganiselwa kuR9.5 million ezifundeni eziseningizimu, entshonalanga nasenyakatho.
Lo msebenzi weminyaka emihlanu ugcwalisa ukuzibophezela kukamasipala ukukhulisa umnotho ofaka wonke umuntu, ekwakheni amathuba, ekuqiniseni amabhizinisi amancane nasekuqhubekiseleni phambili ikusasa lomnotho waseThekwini.