Ingcweti encane yemfuyo ivakashela abalimi emakhaya ngosizo olungandile
WUNOMZAMO MSIMANGO
NGEMVA kokuphothula izifundo zokuphatha izilwane, insizwa yaKwaNongoma, KwaZulu-Natali, yaqala ibhizinisi elisiza abafuyi ngokuya lapho bekhona. Iya ezibayeni ukuyobasiza ngokuma, ukudipha, ukuphawula imfuyo nokubeluleka ngokudla okuyifanele.
UMnu uNeliswa Ntshangase, odume ngelikaCici Lentombi, une-Diploma ye-Animal Science yaseTshwane University of Technology, ayithola ngo-2021. Ngaphambi kokuphothula izifundo, wathwasela umsebenzi eMorgan Beef Feedlot.
Ngemva kwalokho wadlulela eRoadgrass, lapho athola khona ulwazi lokusebenza ngezinkukhu zenyama izinyanga eziyisithupha. Ngemva kokuphothula, wasebenza eMangalamba Agricultural Group eNorth West, lapho afunda khona ubuchule bokuzalanisa izinkomo, izimbuzi nezimvu.
Esebenzisa ulwazi lwakhe lokuzalanisa imfuyo, uNtshangase wasungula ibhizinisi lakhe lokunakekela imfuyo iCici Livestock Multiply ngo-2025. Leli bhizinisi lihlinzeka ngosizo okubalwa kulona ukugoma, ukufaka izimpawu emfuyweni, ukuhlola ukukhulelwa nokululeka ngokudla okufanele kwezilwane.
“Nganquma ukusebenzisa ulwazi namava enginakho ukuze ngiqhubeke ukufunda ngemfuyo kwabanye abalimi bemfuyo abasebenza ezindaweni ezihlukene,” kusho yena.
UNtshangase ehlome ngezikhali zomsebenzi
Nakuba kunesidingo esikhulu salo msebenzi wobungcweti kodwa uNtshangase uthi wumsebenzi onezinselelo. “Enye yezinselelo ezinkulu wukuthi ngemva kokulapha imfuyo, ngishiya imiyalelo kubantu abazibhekile kodwa kwesinye isikhathi abayilandeli. Loku kuphazamisa umsebenzi engisuke sengiwenzile.
“Ngithwala kanzima uma ngisebenza nabanye abalimi abadala ezindaweni ezisemakhaya abangayijwale imigomo nezindlela ezintsha zokuzalanisa imfuyo. Abanye babo abakakwazi ukubaluleka kokugoma imfuyo yabo, ngakho kubanzima ukubakholisa ukuthi basebenzise imigomo ethile,” kusho uNtshangase.
UNtshangase usanda kuqeda ukuqeqeshelwa ukumithisa izilwane ngokuzifaka imbewu e-Agricultural Research Council e-Irene, ePitoli. Uhlela ukusiza amakhasimende ngalolu sizo, okuzokwengeza olunye usizo ebhizinisini lakhe lokunakekela imfuyo.
UNtshangase ushaya ngezimfishane kwabafisa ukuqala ibhizinisi. “Uma kukhona ofuna ukukwenza, kwenze. Akukho okuzokwenzeka uma ungaqali,” kucebisa yena. Ufisa ukwandisa amakhasimende nokukhulisa umsebenzi wokumithisa izilwane ngokuzifaka imbewu, aqhubeke nokukhulisa iCici Livestock Multiply afinyelele nakwabanye abalimi abadinga usizo lobungcweti bokunakekela imfuyo.
Lolu daba luqale lwashicilelwa ku: www.vutivibusiness.co.za
Facebook: Cici Lentombi Ntshangase
Instagram: @cicilentombi
TikTok: @CiciLentombi