Kuphendulwe isoyi eFarrier Business Park emsebenzini wokuthuthukisa iWestown, eThekwini
INTATHELI KAMASIPALA
KUQOPHEKE umlando emsebenzini wokuthuthukisa indawo esentshonalanga yaseThekwini ngenkathi kuphendulwa isoyi eFarrier Business Park ezokwakhiwa ngoR1.3 billion. Lo msebenzi wokwakha indawo ewu-80 000m² yokugcina nokuthutha izimpahla ihambisana nomsebenzi wokuthuthikisa iWestown, eNtshongweni, entshonalanga yaseThekwini.
Lo mcimbi usho umsebenzi omusha wokuthuthukisa iWestown ekhula ngesivinini, okuwuhlelo oluyingqophamlando ngaphansi kweShongweni Urban Development. Lomsebenzi wenziwa ngokohlelo lokubambisana kukahulumeni nezinkampani ezizimele phakathi kukaMasipala waseThekwini neFundamentum Property Group.
Kulindeleke ukuthi lo msebenzi wesikhathi ngokuqhubeka kwesikhathi kutshalwe imali engaphezu kwangoR15bn futhi luguqule lesi sifunda sibeyisizinda esikhulu somnotho nezokuthutha.
FUNDA LAPHA: https://www.umbele.co.za/2025/03/31/ivulwe-ngesasasa-iwestown-square-ewur1-3-billion/
Ikhuluma nabalingani emcimbini, imeya kaMasipala waseThekwini uMnu uCyril Xaba, uthe lo msebenzi ukhombisa ukwanda kwethemba labatshalimali eThekwini nokuzibophezela kwedolobha ukukhulisa umnotho nokuguqula indlela isimo sezindawo.
“Namuhla siphendula isoyi eFarrier Business Park. Loku kuqinisekisa ukuthi umasipala uzimisele ukubhekana nokuhlela izindawo okwadalwa wubandlululo futhi kukhombisa ukuzibophezela kwethu ekukhuliseni umnotho wedolobha nasekudaleni amathuba emisebenzi ebonakalayo.
“Siwumasipala, sitshale imali ecela kuR600 million kwingqalasizinda enkulu yokuxhasa iWestown. Loku kutshala imali kwenze ukuthi kubeneFarrier Business Park nezinye izindawo ezakhiwayo kule ndawo. Lo msebenzi uhlose ukuqinisekisa ukudala amathuba omsebenzi.
“Uhlose ukubhekana nobubha nokungalingani nokuqhuba ukukhula komnotho okufaka wonke umuntu, okugxile entuthukweni futhi okusimeme. Siwumasipala, sizoqhubeka nokwakha ubudlelwano phakathi kukahulumeni nezinkampani ezizimele obuguqula indlela izindawo zethu ezimi ngayo futhi buqhube ukuthi iTheku libeyindawo yokuvakashelwa ethandwayo,” kusho uXaba.
Abaphathi bamasipala nabalingani emkhakheni wamabhizinisi bephendula isoyi eFarrier Business Park eWeston, entshonalanga yedolobha
Njengoba iwu-1.5km ukusuka kuN3 ngomgwaqo waseShongweni Interchange no-30km ukusuka echwebeni laseThekwini, iFarrier Business Park isendaweni ekahle emabhizinisini afuna ukufinyelela ezinhlelweni zesifunda nezezwe zokuthutha izimpahla.
FUNDA LAPHA: https://www.umbele.co.za/2024/08/15/kubekwe-ur217bn-ozoguqula-izinto-ethekwini-imeya/
Lo msebenzi wokwakha uzobaneziza, izindawo zikaNokusho zokuhlala nezokuqasha, ukuze kubenamathuba ahlukene okuqhuba ibhizinisi nokutshala imali. Isikhulu esiphezulu seFundamentum Development Company, uCarlos Correia, sithe lo msebenzi ukhombisa isigaba esilandelayo sentuthuko yeWestown.
Uthe: “Isigaba esilandelayo sokuthuthuka kweWestown sibeyisizinda esikhulu esisha samadolobha nomnotho sesingena emkhakheni wamabhizinisi nezokuthutha izimpahla. Ukwakhiwa kweFarrier Business Park kuhloswe ngakho ukusungula indawo entsha yezinkampani, abatshalimali nabakhi abafuna ukufinyelela kahle kuyona nokuthola amathuba okwakha nokugcwalisa umbono ngeWestown.”
Njengoba iWestown iqhubeka nokuthuthuka ingagcini ngokubayindawo yezitolo neyokuhlaka, kulindeleke ukuthi iFarrier Business Park ikhulise igama lalesi sifunda sokubayindawo evelele yezokuthutha izimpahla namabhizinisi, ivule amathuba okutshala imali eseke ukudala amathuba omsebenzi futhi ibeneqhaza ekuqhubekeni kokukhula komnotho waseThekwini.