Kuklonyeliswe osomabhizinisi abavelele kumaDBF Excellence Awards

YINTATHELI KAMASIPALA

NGOBUSUKU bokuklomelisa osomabhizinisi, ubuciko namaphupho abo, uMasipala waseThekwini uklomelise osomabhizinisi namaciko amabhizinisi abo aneqhaza ekuthuthukiseni umnotho wedolobha nokudala imisebenzi ngomcimbi wemiklomelo iDurban Business Fair (iDBF) Excellence Awards ngoMgqibelo odlule, mhlaka-19, eDurban Exhibition Centre.

Lo mcimbi ubuhlanganise iDurban Business Fair, iLions’ Den Business Plan Competition namaDurban Fashion Fair Recognition Awards. Abanqobile bathole imiklomelo nosizo lokuthuthukisa amabhizinisi abo, okubalwa usizo lwemali yokuthenga izimpahla zokusebenzi nezinye izinto abazidingayo. Imiklomelo ibiqala kuR10 000, iye kuR60 000 emikhakheni ehlukene.

FUNDA NALAPHA: https://www.umbele.co.za/2022/09/26/abasikingqephu-intatheli-yombele-iyabika/

KwiLions’ Den ibinezicelo eziwu-121, inabanqobe ezigabeni ezintathu ezihlukene. I-Sparkle n’ Glow inqobe emkhakheni i-Emerging Business, iCreative Tech yaphuma isibili. I-Super Clean Tekkie Wash iphume phambili kwi-Established Business, kwalandela iThandimpumelelo Hardware endaweni yesibili. IMsuthukazi Group idle umhlanganiso kwi-Entrepreneurship Excellence Award, kwalandela iWaterloo Blocks.

Kuma-Durban Business Fair Excellence Awards, iPlastimed Packaging iwine i-DBF Excellence Award, iMM Clothing yahlabana kwi-Rural and Township-based Business Award, i-Amazizi Leatherworks yawina i-Women-owned Business. Kwi-Youth-owned Business kubambane amabhizinisi amabili iMagaga Media and Communications neGrace Academy High School.

_{Abanye bosomabhizinisi abaklonyeliswe kumaDurban Business Fair Excellence Awards}

Ama-Durban Fashion Fair Recognition Awards aklomelise ubuciko kuyo yonke imikhakha yemfashini. IZwandy iwine i-Best Ladieswear Collection, iHouse of Vyagor Louvre yawina i-Best Menswear Collection, kwathi uKireshen Chetty wawina i-Collection of the Week. USibu Msimang uwine umklomelo i-Durban Designer of the Year, iMartin Bespoke yawina umklomelo i-Fashion Innovator Award. U-Nellie D Designs uwine i-Next Generation and Emerging Durban Designer Award, kwathi uKARENMONKKLIJNSTRA noMita-N Dezynz bobabili bahlabana ng-DFF Special Recognition Award.

Kuma-Rising Star Awards kuphume phambili uHendeika Booi, isibili kwawuSindiswa Khomo, isithathu kwawunoLerato Mabesa. Kuma-New Face Awards uNoxolo Ndabambi uwine i-Plus Size, u-Awande Khuzwayo wawina umklomelo we-Standard Size Female, kwathi uLindokuhle Mnqayi waphume phambili kwabesilisa.

Enkulumweni yokumukela izivakashi ezicela ku-1 000, imeya kamasipala uMnu uCyril Xaba ithe le miklomelo ibonisa ukuzinikela kukamasipala ukuvula amathuba emnothweni, ukudala amathuba okusimama kwamabhizinisi nokwakha umnotho osimeme nofaka bonke abantu.

“Namuhla ebusuku sihlonipha abavelele kepha futhi sigcwalisa isibopho sethu sokuthuthukisa, nokufaka amabhizinisi amancane naphakathi nendawo emnothweni waseThekwini.”

Lo mkhankaso wonke uhlinzeka ngemali engaphezu kwangoR800 000 yokuthuthukisa amabhizinisi amancane namathuba okuwatholela umsebenzi. Imiklomelo yemali izolekelela ukuthuthukisa amabhizinisi, okubalwa ukuthenga izinto zokusebenza nokuwasiza ukuthi asimame.

Amabhizinisi nabasunguli bancome umasipala ngokutshala kumabhizinisi endawo, ukuwaxhasa ngendlela ebonakalayo, ukuwatholela amakhasimende nokuphokophela ukusimama kwamabhizinisi.