‘Phila ngangamandla akho, ulungiselele ikusasa’

Kuleli sonto kuSAZIWAYO NEMALI sixoxa no-Aubrey ‘DJ Black’ Siyesu. Uwu-DJ, umdidiyeli embonini yezokungcebeleka, odume ngokudlala i-Afro house ezindaweni zobumnandi nezokudlela okubalwa iCapello eMhlanga, iCapello eGoli, e-Eden naseViews. Useke wadlala emcimbini wokuthula ama-Metro FM Awards eThekwini. Uthi ukumalungiselelo okukhipha i-EP enabaculi abafana noDJ Verge kanti useke wathola nethuba lokudlala no-DJ Oskido

WUTHOBILE ZWANE

Usemncane wawuphiwa imali?

Yebo.

Waqala nini ukuba ne-akhawunti yasebhange, wayivula kuphi?

Ngo 2009. Ngayivula eFNB. 

Ekukhuleni kwakho yini oyikhumbulayo nowayifunda ngemali?

Imali iwusizo oluhle uma uqikelela ukuthi uyisebenzisa kanjani.

Waqala nini ukusebenza, wenzani umholo wakho wokuqala?

Ngo-2010, ngangihola uR5 000. Ngawubhubhudla ngathenga ucingo i-iPhone isafika ngaleso sikhathi.

Yini into enhle ongathi usuke wayenza ngemali?

Wukuqala amabhizinisi akwazi ukwakha amathuba omsebenzi.

Yiliphi iphutha elithinta imali osuke walenza?

Wukungayihleleli ngendlela. 

Wake walutheka mhlawumbe ngokudlala ibhanoyi?

Cha.

Yisiphi iseluleko esihle owasithola ngemali?

Wukuthi kufanele ngiphile ngangamandla ami, ngingasebenzisi imali ngenhloso yokujabulisa abanye. Ukuzithiba nokukwazi ukuphatha imali kubaluleke kakhulu kunokuthi uhola malini. Kubalulekile ukonga uma ukwazi, utshale imali ezintweni ezingakhula zibenenani esikhathini esizayo futhi uhlale uzilungiselele izimo ezingalindelekile. Imali kufanele ikusebenzele, hhayi kube uwena osebenzela imali impilo yakho yonke.

FUNDA NALAPHA: https://www.umbele.co.za/2025/05/30/imali-akuyona-into-yokubhubhudlwa-namantombazane/

Uma ungawina uR1 million kwiLotto ungawusebenzisa kanjani?

Okokuqala, ngeke ngijahe ukuyisebenzisa. Ngingazinika isikhathi sokuhlela kahle ukuthi ngizoyisebenzisa kanjani. Enye ingxenye ngingayitshala, enye ngiyisebenzisele ukukhulisa amabhizinisi ami nokwakha ezinye izindlela zokungenisa imali bese enye ngiyibekela ikusasa lendodakazi yami. Ngingasebenzisa enye ingxenye ukusiza umndeni wami nokwenza into ezobanomphumela omuhle emphakathini. Kimina okubalulekile kungaba wukuthi lowo R1 million ngiwusebenzise ngendlela ezokwakha okuthile okuhlala isikhathi eside kunokuthi ngiwusebenzise ezintweni ezizongijabulisa okwesikhashana.

Ungabeluleka uthini abanye abasemkhakheni wakho ngokuphatha imali?

Ungavumeli indlela ophila ngayo (ishintshe) ngokushesha kunendlela imali yakho engena ngayo. Kwesinye isikhathi emikhakheni esikuyona kubanengcindezi yokuthi umuntu abonakale ephumelele kodwa ukubukeka sengathi uphumelele nokubanesimo esihle ngokwezimali yizinto ezimbili ezingafani. Yibanohlelo lokusebenzisa imali, wonge njalo, ugweme izikweletu ezingadingeki futhi uzame ukubanezindlela ezingaphezu kweyodwa zokungenisa imali. Tshala kuwena nakwikusasa lakho. Empilweni kuba nezikhathi lapho izinto zihamba kahle, kube nezikhathi ezinzima. Ngakho-ke uma izinto zihamba kahle, lungiselela izikhathi lapho zingase zingahambi kahle khona.