Asimile Siyaqhuba: i-uShaka Marine World iseyindawo yokuvakasha ethandwayo nanamuhla
YINTATHELI KAMASIPALA
KULELI sonto sibheka indawo kaMasipala waseThekwini i-uShaka Marine World okuyindawo yokungcebeleka nokuvakasha. Loku kungenxa yokubaluleka kwezokuvakasha ekuheheni izivakashi ukuthi zize eThekwini nokudala amathuba omsebenzini kulo mkhakha.
I-uShaka Marine World nanamhlanje isengenye yezindawo zokungcebeleka ezidumile, njengoba yaheha izivakashi ezingaphezu kuka-130 000 ezikhokhayo ngoDisemba wango-2024. Kwanyathela abantu abawu-132 033 ngoDisemba wango-2025. Seloku yavulwa eminyakeni ewu-22, le ndawo yokungcebeleka isivakashelwe ngabantu abawu-17 million kuzekubenamuhla.
Ngokusho kwesikhulu esiphezulu uMnu uNdabo Khoza, ngonyaka wezimali ophele mhlaka-30 wangoJuni wango-2025, le ndawo yokungcebeleka isimame ngo-19.53% ngokomnotho uma kuqhathaniswa unyaka nonyaka, okuwukudlondlobala okucishe kuhambisane nokwangaphambi kokubheduka kwe-Covid-19.
FUNDA NALAPHA: Asimile Siyaqhuba: Sekuphele iminyaka emihlanu sihlinzeka amanzi asezingeni eliphezulu
UKhoza uthe i-uShaka Marine World ingenye yezindawo ezithandwa yizivakashi kakhulu eThekwini nendawo ethandwa yizivakashi zasekhaya nezaphesheya.
Into eyenza ihluke kakhulu yi-uShaka Sea World, okuyindawo ehlala izilwane zasemanzini enkulu kunazo zonke entshonalanga Afrika nenye yezinkulu emhlabeni, lapho kutholakala khona izilwane zasemanzini eziyizinkulungwane emkhunjini owacwila.
Izivakashi zikwazi ukuxoxelwa ngamahlengethwa, izimvu zolwandle nezinyoni zolwandle, zibone oshaka eduze, zibone nezilo kwiDangerous Creatures Reptile House enezinye zezinyoka ezinobuthi kakhulu emhlabeni nezingaqondwa ngabantu futhi zidlale imidlalo yasemanzini engatholakali kwezinye izindawo.
Ngale kokungcebeleka, iSouth African Association for Marine Biological Research (iSAAMBR), elawula i-uShaka Sea World, ineqhaza elikhulu ekufundiseni ngempilo yasemanzini, ukuyigcina nokucwaninga, okwenza izivakashi ukuthi zixhumane futhi zifunde kabanzi ngolwandle.
NeWet ‘n Wild, iVillage Walk nezinye izindawo, i-uShaka Marine World ngenye yezindawo zokungcebeleka ezimangalisayo eThekwini.
UTHI UBUWAZI?
- Indawo yokushelela ende kunazo zonke e-Africa ise-uShaka Marine World;
- I-uShaka Marine World ivulwa zonke izinsuku onyakeni;
- I-uShaka Marine World inendawo yokugcina izilwane zasemanzini enkulu kunazo zonke kuHhafu waseMhlabeni;
- I-Shipwreck Aquarium neCargo Hold restaurant zisemkhunjini owacwila kudala ngama-1920, okuthiwa kwenzeka esiqhingini iSea World Island;
- I-uShaka Sea World inezinyoni zolwandle eziwu-58, amahlengethwa ayisikhombisa (awesilisa amahlanu namabili esifazane) nezimvu zolwandle eziyisikhombisa;
- Iyikhaya lezinhlobo eziwu-11 zoshaka;
- Yindawo yokungcebeleka enezilwane zamanzi enkulu kunazo zonke e-Africa;
- I-uShaka Sea World wukuphela kwendawo e-Africa lapho khona izivakashi zikwazi ukufunda ngamahlengethwa;
- Ofishi base-uShaka Marine World baphakelwa amaveji cishe awu-5kg ngesonto;
- Kufakwa amanzi olwandle cishe awu-8 million litres e-uShaka Sea World nsuku zonke;
- E-uShaka Marine World ngamahhovisi e-Oceanographic Research Institute, uphiko lweSAAMBR, ehlonishwa emhlabeni jikelele;
- Yindawo enkulu yokugcina imvelo e-Afrika;
- Umphakathi ukwazi ukwenza imicimbi yekhethelo njengemishado endaweni egcina izilwane noma imicimbi eWet ‘n Wild naseWahooz Restaurant;
- Abafundi abangaphezu kwabawu-100 000 bafakashela i-uShaka Sea World Education minyaka yonke.
- Kuyatshuzwa ukubona oshaka eSea Animal Encounters Island e-uShaka Marine World.