‘Bekela imali ikusasa’
Kuleli sonto kuSAZIWAYO NEMALI sixoxa noSihle Chiliza. Uwumlingisi oseke wadlala emidlalweni yakuthelevishini okubalwa kuyona i-Redemption, lapho edlala khona indawo kaYoung Simon, i-Durban Gen, lapho edlala khona indawo kaCashier ne-Angels by Roberts Benjamin nasemidlalweni yeshashalazi enjenge-Double-You, i-Shakespears, i-My Journey, i-The Chameleon ne-Dear Sponono. Kumafilimu aseke adlalwa kuwona kubalwa i-Nguquko ne-Angels
WUTHOBILE ZWANE
Usemncane wawuphiwa yini imali?
Yebo, ngangiphiwa imali.
Waqala nini ukuba ne-akhawunti yasebhange, wawuyivula kuliphi?
Ngaqala (sengifunda amabanga) aphezulu, ngifunda iBanga leShumi uma ngingaphosisi. Ngayivula eStandard Bank.
Ekukhuleni kwakho yini oyikhumbulayo nowayifunda ngemali?
Wukuthi imali iyabekwa, yingakho nganginesikoqokoqo ngisakhula.
Waqala nini ukusebenza, wawenzani umholo wakho wokuqala?
Ngaqala ukusebenza ngisafunda uMatikuletsheni. Ngathenga igrosa ekhaya.
Yini into enhle osuke wayenza ngemali?
Wukuthenga igrosa ekhaya nokusiza uMa ekhaya ngokuthenga izinto ezithile.
Yiliphi iphutha elithinta imali osuke walenza?
Wukugcina usuthenga izinto ezithile ezingenasidingo. Uthi usunezingubo ezithile ngenxa yokuthi ubuhala uzithole usuthenga ngokweqile.
Wake walutheka mhlawumbe ngokudlala ibhanoyi?
Cha.
Yisiphi iseluleko esihle owasithola ngemali?
Wukuthi imali iyabekwa nokuthi uhlale ukhumbula ukuthi ikusasa lithini, kufanele uhlale ubeka.
Uma ungawina uR1 million kwiLotto ungawusebenzisa kanjani?
Ngingashiya umphakathi ngokuthula, ngihambe ngithule ngithi du. Yiyona ndlela engingawusebenzisa ngayo ngedwa futhi nomndeni wami ngibone ukuthi ngenzenjani.
Ungabeluleka uthini abanye abasemkhakheni wakho ngokuphatha imali?
Wukuthi nje bafowethu nizame ukubeka imali ngoba umsebenzi kulo mkhakha wethu uyivelakancane. Kunoma yiliphi ithuba olitholayo, kungaba u-20% waleyo mali, zama ukuyibeka ebhange.