I-Sars isiza amabhizinisi amancane ngosuku lwawo
YINTATHELI YOMBELE
I-SOUTH African Revenue Service (iSars) igubha usuku lwamabhizinisi amancane i-Small, Medium and Micro Enterprises (i-SMME) Day ngohlelo lokuwalekelela ezweni lonke ngenxa yokwazi iqhaza lawo ekukhuliseni umnotho nokuqoqa intela.
Kulo mkhankaso ozokwenza ezweni lonke, iSars izobanemicimbi emibili emikhulu kusukela namhlanje kuya ngoLwesihlanu eMpumalanga naseNtshonalanga Kapa okuyingxenye yesonto yokulekelela amabhizinisi amancane i-SMME Support Week eliqale izolo, lize liphele ngoLwesihlanu.
Phakathi kosizo oluzotholwa ngamabhizinisi amancane kuzobawukusizwa ukubhalisela intela, ukuhambisana imithetho yentela nokusiza izinkundla zobuchwepheshe ukuthobela umthetho wentela nokuthola usizo.
Ukhomishana weSars uDkt uJohnstone Makhubu uthe: “Sizoletha usizo lweSars mathupha emiphakathini ezweni lonke sigxile eMpumalanga naseNtshonalanga Kapa nangezinye izinhlelo kuzo zonke izifundazwe zakithi.
FUNDA NALAPHA: Isinomphathi omusha iSouth African Revenue Service
“I-Sars ikhuthaza wonke amabhizinisi amancane ukuthi alisebenzise leli thuba axhumane ngqo nezisebenzi zethu, athole usizo futhi aqinisekise ukuthi izindaba zawo zentela zihamba kahle,” kusho yena.
Umqoqinteli uzobanoxhaxha lwezinhlelo kuzo zonke izifundazwe ukugubha i-International SMME Day, ezihlose ukusiza amabhizinisi amancane ngokuwafundisa ngentela nokuthobela umthetho.
Namhlanje iSars izovakashela eNtshonalanga Kapa e-Avondale Hall e-Atlantis naseParow Minor Hall eGlenlily, kuthi ngoLwesine iye eMpumalanga Kapa, eGqeberha eSars Building nakuKomani eTobi Kula Indoor Sports Centre.