Ukunyusa imalimboleko kuzoshaya abalimi namakhasimende ephaketheni – ingqapheli

WULANGA KHANYILE

UMPHUMELA wokunyusa imalimboleko uzozwela embonini yezolimo, ezophoqeka ukudlulisela izindleko zayo kumakhasimende ngokunyusa amanani okudla nophethroli.

Isho kanje inhloko ye-Agribusiness eStandard Bank Business & Commercial Banking uMnu uBrendan Jacobs ngemva kokuthi iBhange lomBuso linyuse imalimboleko ngo-25 basis points yawu-7.25%.

FUNDA NALAPHA: https://www.umbele.co.za/2026/09/25/lilonke-ubunzima-lo-nyaka-emnothweni-womhlaba-nowaseningizimu-afrika-ukganyago/

Uthe: “Ukunyuswa kwemalimboleko bekuvele kulindelekile ngenxa yezinto ezenzeka kwamanye amazwe ikakhulu impi eseMiddle East, ethinta imikhiqizo yezolimo njengomanyolo nodizili. “Nakuba inhloso yokunyusa imalimboleko kuwukunqanda ukwehla kwamandla emali, nokho kuzokwandisa izindleko zabalimi nawo wonke amabhizinisi asemkhakheni wezolimo,” kusho yena. Uthe loku kwenzeka ngesikhathi abalimi bevele bebhekene nokunyuka kukaphethroli nezinye izinto zokukhiqiza.

U-Jacobs uthe umphumela wokuzokwenzeka kwezolimi uhambisana nesimo sezulu esishisa ngokweqile ngenxa ye-El Niño abathengi bazothelwa amachaphazelo kunyuke amanani ezimpahla. “Ngokunyuka kwezindleko zomsebenzi, nakanjani ezinye zalezo zindleko zizodluleka kubantu. Kulindeleke ukuthi kunyuke amanani okudla ngokuqhubeka kwesikhathi,” kusho yena.

Nakuba zikhona lezi zinselelo, uJacobs uthe uthemba ukuthi imboni yezolimo yaseNingizimu Afrika izokwazi ukuqhubeka nokukhiqiza ukudla okwanele ezweni.