Kufike imijovo yamatele emisha ivela phesheya
INTATHELI YOMBELE
UNGGQONGQOSHE womNyango wezoLimo ezweni uMnu uJohn Steenhuisen umemezele izolo ukuthi kufike omunye umthamo wemijovo yamatele evela phesheya.
Kufike imijovo iDollvet ewu-2 million eNingizimu Afrika, emkhankasweni wokunqanda ukubhebhetheka kwalesi sifo esibulala izinkomo.
Uthe: “Ngijabule ukuthi i-Agricultural Research Council ifake imijovo ewu-20 000 mhlaka-12 wangoJuni, okusho ukuqala ukufaka emabhodleleni eminye imijovo ewu-20 000 ungakapheli uJuni, okusho ukuthi azobawu-40 000 wenyanga. Kumqoka ukuthi siloku siqhubekile nokuhlinzeka imijovo.”
FUNDA NALAPHA: INingizimu Afrika ithole imijovo yamatele ewu-1.5 million
Lezi zibalo zikhombisa ukuthi izifundazwe ziyalilalela ikhwelo elihlatshiwe lokuthi kujovwe izinkomo ngokushesha. Umnyango ubika ukuthi seziwu-5 486 860 izinkomo ezijoviwe kuzekubemanje.
U-Steenhuisen uthe uthakase kakhulu ngezinga lokujova imfuyo eFree State Province, elifinyelele ku-1 015 020 ngomhlaka-11 wangoJune 2026.
Sezizonke izibalo zokujova ngokwezifundazwe zimi kanje: iMpumalanga Kapa wu-891 924, iFree State wu-1 015 020, iGauteng wu-351 945, iKwaZulu-Natali wu-1 163 193, iLimpopo wu-357 045, iMpumalanga wu-531 096, iNorth West 753 522, iNyakatho Kapa wu-114 071 kuthi iNtshonalanga Kapa kubewu-309 044.
“Ngixoxa nomnyango wami, nganxusa ukuthi uphuthumise umbiko i-Section 9 Report, okufanele ifike ehhovisi lami ezinsukwini ezimbalwa ezizayo, ezoletha olunye usizo kubalimi bakithi,” kusho yena.
Ungqongqoshe ubonge nemboni ezimele nodokotela bemfuyo ngokubambisana nohulumeni ukuphuthumisa ukujova izinkomo, wathi “injongo kufanele ime; yokubambisana ukujova izinkomo eziningi ukuqeda lolu bhubhane nokuqinisekisa wukubheduka kwalesi sifo kokugcina eNingizimu Afrika”.