Kuzohlomula abahwebi abancane abangaphezu kuka-400 eThekwini lonke
YINTATHELI KAMASIPALA
UMASIPALA waseThekwini Municipality uyaqhubeka nokudala amathuba abonakalayo omnotho kwizakhamuzi zawo.
Ukutshala emkhakheni wabahwebi abangabhalisiwe njengezinkampani nakwingqalasizinda yokudayisa ezimakethe, umasipala unxusa abahwebi ukuthi bafake izicelo zezindawo zokuhweba eThekwini namaphethelo.
Lo mkhankaso uhlose ukuthi abahwebi babenezindawo zokusebenza ezingabizi, usimamise umnotho wamabhizinisi amancane futhi udale amathuba.
Izindawo ezinezikhala zisezifundeni ezihlukene. Kunezindawo eziwu-10 enkabeni yedolobha, eziwu-123 eningizimu yedolobha, eziwu-50 maphakathi nasemaphethelweni entshonalanga, eziwu-47, ezindaweni ezisenyakatho, eziwu-14 enyakatho ekude, eziwu-120 ezimakethe zokudayisa eziseningizimu neziwu-31 ezimakethe zokudayisa ezisenyakatho.
Ezindaweni ezikhona kukhona amatafula okudayisa izithelo namaveji, izinkukhu, amakhambi okwelapha, izindawo zokushutha nokuzokubhucabhuca imizimba ezisemabhishi.
Abantu abafaka izicelo bangathola isikhangiso esiphelele namafomu okufaka isicelo ngokucindezela lapha: https://tinyurl.com/22nrujh7 noma bangangena kwi-website kamasipala ethi: www.durban.gov.za bathole ifomu ngaphansi kwezasiso zomphakathi, phecelezi Public Notices.
Izicelo kufanele zibe nencwadi yesicelo, umazisi, ubufakazi bendawo yokuhlala, incazelo ngohlobo lokuhweba, isimo sobulili nesokukhubazeka, uma umuntu enokukhubazeka.
Abantu abafaka isicelo kufanele bahwebe usuku lonke, bangasebenzi futhi bangabinelinye itafula likamasipala.
Ukumukelwa kwezicelo kuvalwa mhlaka-6 wangoMashi ngo-12 emini.
Usihlalo weKomiti lokuThuthukisa umNotho nokuHlela uMnu uThembо Ntuli uthe izindawo zokuhweba zihambisana namabhizinisi ehlukene njengezitshalo, amakhambi, izinsimbi zezimoto, ama-flea market, izimboni ezincane, izinkukhu, ukudla, imisebenzi yezandla nezinto ezihambisana nezokuvakasha.
Uthe la mathuba awumphumela womsebenzi oqhubekayo kamasipala wokutshala kwingqalasizinda yokuhweba.
“Eminyakeni emihlanu edlule silungise izindawo okubalwa kuzona e-126 Johannes Nkosi Building, e-Illovo Auto Hub, ku-64 Flower Road naseMlazi V-Section Container Park. Sakhe izizinda zamabhizinisi ezintsha eBlue Lagoon, eCornubia, eFolweni naseMidway Mall. Izimakethe zokudayisa ezilungisiwe yiVerulam, iPhoenix, Ezimbuzini ne-English Market. Lo msebenzi uxhase abahwebi aba-636, wadala imisebenzi ewu-124 ngonyaka wezimali u-2023/24.”
UNtuli wengeze ngokuthi imboni yabahwebi abangabhalisiwe imqoka emnothweni wendawo. “Ngokwakha nokulungisa ingqalasizinda, sakha izindawo ezihloniphekile zamabhizinisi amancane ukuze asimame.”