Asimile Siyaqhuba: Iminyaka emihlanu yokusimamisa umnotho ngezinkundla ezisezingeni eliphezulu
YINTATHELI KAMASIPALA
UKUQHAKAMBISA umsebenzi omuhle kaMasipala weTheku kusukela ngo-2021 kuya ngo-2026, kunomkhankaso i-Five-Year Service Delivery Milestone enendikimba ethi: “Asimile Siyaqhuba: Resilience Through Adversity”, okusho ukuphokophela ngisho kunzima.
Kulolu daba siqhakambisa izinkundla zemidlalo ezisezingeni eliphezulu zikamasipala.
UPhiko lweziNkundla zemiDlalo luneqhaza elikhulu ekuqinisekiseni ukuthi izinkundla nezindawo ezinkulu zedolobha zisebenza kahle, ziphephile futhi zikwazi ukuletha inzuzo ebonakalayo emphakathini nasemnothweni waseThekwini.
Lolu phiko olubhekene nokuphatha izinkundla nokuthi izinkundla ezinjengeMoses Mabhida Stadium zingenise imali, ngokunemicimbi, ukuphatha ukusebenza kwezindawo, ukwakha ubambiswano nemikhankaso yokungenisa imali.
Ngokubanemidlalo emikhulu, amakhonsathi, imibukiso nemicimbi yezinkampani, lolu phiko luqinisekisa ukuthi lezi zindawo zisetshenziswa ngokugcwele futhi zisimamisa ezokuvakasha, ukwakha amathuba omsebenzi nokuchumisa amabhizinisi endawo.
Ngokuhlela ngobuhlakani nokusebenzisana nabalingani, umasipala uqinisekisa ukuthi lezi zindawo zihlala zisebenza, zivuselela umnotho futhi zivulekele imiphakathi.
Enye yezinto ezibeyimpumelelo enkulu kul eminyaka emihlanu kubewukuthola imali yokulungisa nokuphucula ingqalasizinda nezinye izindawo zaseMoses Mabhida Stadium, ukuze kugcinwe izinga lokuphepha ukuhambisa nomthetho olawula ezokuphepha nezikaqedisizungu i-Safety at Sports and Recreational Events Act neminye imigomo elawula ukuphepha nokwenza imicimbi emikhulu yezemidlalo nezokungcebeleka.
FUNDA NALAPHA: https://www.umbele.co.za/2026/06/29/asimile-siyaqhuba-uhlelo-lukamasipala-lokusebenzisa-umhlaba-ngobuhlakani-luvula-amathuba/
Le misebenzi yokuphucula ingqalasizinda yandise izinga lokuphepha, ukusebenza ngendlela efanele nokuqinisekisa ukuthi le nkundla ihlala ilungele ukubanemicimbi esezingeni lomhlaba.
Ukuze zonke lezi zindawo zikamasipala ziqhubeke nokusebenza ngazo zonke izikhathi, lolu phiko lufake ama-generator kuzo zonke izinkundla zomphakathi okubalwa kuzona iKing Zwelithini, iPrincess Magogo, iSugar Ray Xulu neMpumalanga Stadium ngemali elinganiselwa kuR6.8 million.
Loku kutshala imali kuqinisekisa ukuthi umsebenzi uyaqhubeka kule lezi zindawo ngisho kuphele ugesi ukuze umphakathi nabantu bezemidlalo bakwazi ukuqhubeka nokuzisebenzisa.
EMpumalanga Stadium kufakwe izibani zasebusuku ngoR8m, ukuze le nkundla ukubanemidlalo yasebusuku nemicimbi emikhulu. Ngonyaka wezimali wango-2023/24 kuphinde kwalungiswa amagumbi okushintshela abadlali ukuze abeyisimanje.
Ngaphezu kwalokho, lolu phiko luphothule ukulungisa amagumbi okushintshela abadlali eChatsworth Stadium, kwaphuculwa indawo yokugijima.
I-Chatsworth Stadium ngenye yezinkundla zikamasipala ezivuselelwe
NgaseMngeni kufakwe izibani zesikhashana, uthango lukasimende nezindlu zonogada ukugada le ndawo ukulungiselela ukusebenza kwayo nokuqinisekisa ukuvikeleka kwezimpahla nokuhambisana nemigomo yokuphepha.
Ukusebenza kwendlela entsha yobuchwepheshe ukungena ngamakhadi obuchwepheshe eMoses Mabhida Stadium kushintshe izinto kakhulu kubahleli bemicimbi nabantu abadayisa amathikithi.
Lolu hlelo luyakwazi ukuskena izinhlobo ezahlukene zamathikithi, lwenze ukungena kwabavakashi kube lula, kusheshe futhi kube sezingeni eliphezulu. Njengoba le ndlela izokwazi ukufunda zonke izinhlobo zamathikithi, izophucula izinto kubabukeli namakhasimende ngokuthi kungeneke enkundleni ngaphandle kobuhixihixi.
Lokhu sekwenze ukuthi kungeneke ngokushesha nakalula, kwaphucula ukuphepha kwezihlwele nokugada izimo eziphuthumayo.
Kule minyaka emihlanu, iMoses Mabhida Stadium, eyinkundla enkulu, ibenemicimbi emikhulu nemidlalo esezingeni eliphezulu, okubalwa kuyona iNedbank Cup, imidlalo yebhola lasekhaya neyomhlaba nemicimbi emikhulu yezokungcebeleka, ukufakazela igama layo lokubayindawo esezingeni lomhlaba.
Le nkundla iyaqhubeka ukubaneqhaza lokusimamisa umnotho, imboni yezokuvakasha nokwenza iTheku ukuthi ibeyindawo yezimidlalo nemicimbi evelele evakashelwa ngabantu bakwezinye izindawo.