Amabhizinisi aseKZN asebenzisa i-Africa’s Travel Indaba ukusabalala
WUNOSIHLE ZULU l newsroom@likhanyiletm.co.za
AMABHIZINISI amancane asemkhakheni wezokuvakasha KwaZulu-Natali abeke amathemba awo embukisweni omkhulu wezokuvakasha i-Africa’s Travel Indaba (i-ATI) yalo nyaka ukuze kuvuleke amathuba amasha okukhula nokwaziwa kakhulu.
Lo mcimbi oheha abezokuvakasha ezwekazini lonke ubanika ithuba lokuzikhangisa nokubambisana.
Kulo mbukiso ose-Inkosi Albert Luthuli International Convention Centre eThekwini, KwaZulu-Natali, amabhizinisi amancane awu-120 asekwe umNyango wezokuVakasha ngaphansi kohlelo i-Market Access Support Programme oluthwala izindleko zokuba kulo mbukiso.
Ungqongqoshe wezokuVakasha uNkk uPatricia de Lille uthe lolu hlelo lwenzelwe ukuqinisekisa ukuthi ababheke ezokuvakasha emalokishini, ezindaweni ezisemakhaya bayakwazi ukuthola amakhasimende aqhamuka kwamanye amazwe.
“Umnotho wethu wezokuvakasha kufanele uhlanganise wonke umuntu ezweni lethu. Yingakho silethe amabhizinisi amancane anomdlandla nalawo enza izinto ngendlela yesimanje kulesi sigcawu samazwe ukuze bathole amathuba,” kusho yena.
Phakathi kwalaba bakhangisi bekukhona ibhizinisi laseRichards Bay iNomusa B&B and Jenny’s B&B. Imenenja uNks u-Itumeleng Seleke ithe ibhizinisi belidonsa kanzima, ikakhulu ngezimpelasonto, ngenxa yokuthi bezincipha izinkampani ezisebenzisa le ndawo ngezimpelasonto.
“E-Richards Bay kujwayele ukuvakasha izinkampani phakathi nesonto. Sizama ukukushintsha loko ngokuphucula ukufika kwezivakashi zizongcebeleka,” kusho yena.
Ukulungisa izinto, leli bhizinisi lisebenzisana namanye amabhizinisi elakhelene lawo ukudayisa ukudla kwesintu nokuhlela ukuthi abantu bavakashe emalokishini.
“Sizokwethula uhambo lwethu lokuqala oluqhakambisa amasiko kule mpelasonto, sisebenzisa ulwazi esiluthekele kwiBONDAY, uhlelo lwe-ATI olufundisa ngokuthola amathuba,” kusho uNks uSeleke.
Obeqala ukuza lo mcimbi, uMnu uSbonelo Simelane, owumqondisi weHamboluhle Travels and Shuttle Services, uthe yena ubezokwakha ubudlelwano nabantu abakhona embonini.
FUNDA NALAPHA: https://www.umbele.co.za/2025/04/24/i-afrika-ayivuki-kodwa-ivukile-i-africas-travel-indaba/
“Akukona nje ukukhangisela izivakashi kodwa kumayelana nokuxhumana nabanye abanikazi bamabhizinisi. Sakha ubudlelwano nokufunda omunye komunye,” kusho yena.
Elinye ibhizinisi elincane iGo-Karting yasemakhaya eMtubatuba isebenzise le nkundla ukufuna usizo lwemali nokuthola abantu abangabamba iqhaza nabo.
Umnikazi webhizinisi uNks uSandisiwe Mngadi uthe ubefuna iGo-Karting yaziwe kakhulu nokucosha amasu okwenza imicimbi yemijaho engaheha izivakashi zakwamanye amazwe.
“Siyazenzela izinto ngoba asilutholi usizo lwemali olutheni kwiziphathimandla zendawo kodwa umbono wethu mkhulu kunesingakwazi ukukufeza sisodwa,” kusho uNks uMngadi.
Uthe ukholelwa ukuthi ukukhulisa ibhizinisi kungaba kuhle emnothweni wezwe. “Izivakashi ezisuke zize emcimbini yemijaho zidinga izindawo zokulala, ukudla nokunye, okwenza kuhlomule namanye amabhizinisi endawo,” kusho yena.
Yize usizo lwemali luloku luncane, uNks uMngadi uncome umNyango wezokuVakasha ngokunika leli bhizinisi umfutho ukuze libonakale. “Inkampani yethu iyakhangiswa, okusigqamisayo,” kusho yena.
Lolu daba luqale lwashicilelwa ku: https://vutivibusiness.co.za/