Amanzi angena endlini kwiPublic Investment Corporation kusula abaqondisi ababili
YINTATHELI YOMBELE
KUNGAKAPHOLI maseko ibhodi yePublic Investment Corporation (iPIC) imise isikhulu sayo esiphezulu, isikhungo esilawula imboni yezimali iFinancial Service Conduct Authority (iFSCA) isiqale uphenyo ngokwenzeka kule nkampani kahulumeni etshala izimali.
Emva kokuvela kwezindaba zokuthi iFSCA isiyaphenya sekusule abaqondisi ababili bePIC oNks uThabi Nkosi noNosiphiwo Balfour.
Yize kukhona abashiyayo ibhodi imemezele ukuthi oyisikhulu esiphethe izimali uNks uBatandwa Damoyi nguye ozobamba njengesikhulu esiphezulu kuze kuphothulwe izinhlelo zangaphakathi.
UNks uDamoyi uyi-chartered accountant, wafika ePIC ngo-Ephreli wango-2024 ezoba yi-chief financial officer. Ibhodi ithe uneminyaka engaphezu kwewu-17 ephethe izimali, ngako uyena embona efanele ukubamba amatomu okwamanje.
Esitatimendeni sayo, iFSCA ithi ibone ukuthi ayisukume ngemva kokubona izinto ezenzeka ePIC. Kuleli sonto iPIC enemali elinganiselwa kuR3.7 trillion uma kubalwa neyitshalile, imise isikhulu sayo esiphezulu uMnu uPatrick Dlamini.
Ibhodi yePIC ithathe lesi sinqumo ngemva kokuthola umbiko ophathelene nokungaphathi kahle izimali nokungalandeli imithetho yokusebenza kwezinkampani ezitshala imali.
Kubenezinsolo ezenziwa ngabantu abazifihla amagama abalwa nenkohlakalo, abasola iPIC ngokungalandeli umthetho odabeni lokutshala imali esikhumulweni saseGauteng iLanseria, baveza nezinye izinsolo zokungaphathi kahle imali.
FUNDA NALAPHA: https://www.umbele.co.za/2026/07/14/isikhulu-esiphezulu-sepic-simisiwe-emsebenzini/
“Emva kokubona okwenzeka ePIC sibone ukuthi kufanele siyiphenye njengenhlangano esebenza ngemali elawulwa yimithetho yeFSCA. Sikhathazekile ngezinsolo zokungaphathi ngendlela, ukumisa isikhulu esiphezulu, umbiko wenkohlakalo nokunye okwenzeka ePIC. Uphenyo lwethu lulandela isigaba 135 somthetho wokusebenza kwezimali i-Financial Sector Regulations Act,” kusho iFSCA.
Ibhodi yePIC ithe iyalumukela uphenyo lweFSCA futhi izobambisana nayo iyinike yonke imininingwane eyidingayo ukwenza uphenyo. “Seloku yabakhona ibhodi iyaqinisekisa ukuthi iPIC iphethwe ngendlela efanele futhi ilandela iziphakamiso zekhomishini yeJaji uLex Mpati eyayiphenya ukungaphathi ngendlela kuyo.
Esitatimendeni sokuziphendulela, iPIC ithe: “Siyakwamukela ukuthi iFSCA ikubheke ngeso lokhozi okwenzeka ezinhlanganweni embonini yemali. Loku kuyasiza ukuthi zonke izikhungo zisebenze ngendlela efanele kuvikelele nempesheni yabantu esiyitshalayo.”
Ithe nongqongqoshe womNyango weziMali wacacisa ePhalamende ukuthi iPIC kufanele iphatheke ngobuqotho emva kweziphakamiso zekhomishini kaMpati.
Emva kokusebenza kweziphakamiso zekhomishini kaMpati kubonakale isimo sishintsha ePIC njengoba sekuvela izindaba zokumisa isikhulu esiphezulu.