Asimile Siyaqhuba: Iminyaka emihlanu yokusimamisa imboni yezolimo
INTATHELI KAMASIPALA
MKHULU umsebenzi owenziwe wuMasipala waseThekwini endimeni yezolimo. Lo msebenzi ubonakala ngomkhankaso weminyaka emihlanu wezinto ezizuziwe i-Five-Year Service Delivery Milestones, ngaphansi kwendikimba ethi “Asimile Siyaqhuba: Resilence Through Adversity”, okusho ukuphokophela nasebunzimeni.
UmNyango wamaBhizinisi eZolimo lukamasipala, ongaphansi koPhiko lokuThuthukisa umNotho, weseka amabhizinisi ezolimo amancane kuyo yonke imikhakha yemboni yezolimo. Umsebenzi wawo usekelwe wumhlahlandlela kamasipala obizwa nge-10-Year Masterplan, eyaphasiswa wuMkhandlu ngo-2020.
Lo mhlahlandlela ubeka eqhulwini izinto ezimqoka ezinhlanu, okuwumthunzi wezinkukhu, izimvu, izingulube, izithombo zamaveji nezinkukhu zenyama nezamaqanda. Phakathi kwango-2021 nango-2025, lo mnyango utshale imali kwingqalasizinda, ukufukamela amabhizinisi, ukucija amakhono nezinhlelo zokungena ezimakethe.
FUNDA NALAPHA: https://www.umbele.co.za/2026/06/30/asimile-siyaqhuba-sekuphele-iminyaka-emihlanu-umasipala-wasethekwini-uqinisekisa-ugesi-othembekile/
Eminyakeni emihlanu edlule, lolu phiko lusimamise indima yezolimo, lwandisa amathuba okungena ezimakethe kubalimi abancane futhi lwadala imisebenzi ebonakalayo.
Uhlelo lokufukamela i-AgriPark Incubator Programme lugqugquzela ukufaka wonke umuntu ngengqalasizinda, izindawo zokwenza imikhiqizo, ukufukamela nokuxhumanisa nezimakethe. Umasipala unama-AgriParks amathathu, okuyiCato Ridge AgriPark (eSifundeni esiseNtshonalanga), iCottonlands AgriPark (eSifundeni esiNyakatho) ne-Ottawa AgriPark (eSifundeni esiNyakatho).
Phakathi kwango-2021 nango-2025, la mapaki ehlangene atshale imali ecela kuR42.5 million kwingqalasizinda. Kuyona kubalwa izindawo zokuchamisela izinkukhu zenyama, ukudla kwezimvu, izindawo zokuphendula isivuno, izindawo zokugcina isivuno, ukubiya, izinto zokuchelela, ukufaka ugesi emahhokweni, izitofu zamalahle nengqalasizinda yamanzi.
Umphumela wala ma-AgriPark phakathi kwango-2021 nango-2025:
1) Aseke amabhizinisi awu-19;
2) Adale imisebenzi ewu-375;
3) Umnotho uhlomule ngemali ecela kuR70 million;
4) Umasipala utshale uR42.5 million;
5) Kudayiswe izinkukhu ezingaphezu kweziwu-1 million kusukela kwavuselelwa iCato Ridge ngo-2022.
Uhlelo lokucija abalimi namabhizinisi i-Farmer Skills and Enterprise Development Programme luphucula izinga lomkhiqizo nelokuqhudelana ngendlela ehlelekile yokuqeqesha nokucathulisa. Lolu hlelo lwaqalwa ngo-2022 kanti lwenziwa ngezigaba ezihlukene. Isigaba sokuQala nesesiBili kutshalwe uR32 million, owaqala uxhaswe wuhlelo lokuqasha umphakathi i-Public Employment Programme.
Umphumela nokuzuziwe:
1) Kuxhaswe amabhizinisi ezolimo amancane awu-673;
2) Abantu abahlomule ngamakhono nokucathuliswa bawu-457;
3) Amathuba emisebenzi adaliwe nazovela angaphezu kwawu-1 050;
4) Umasipala utshale uR32 million.
Osizweni kubalwa ukuqeqesha ngamakhono obungcweti nawokuphathi, ukuhlela amabhizinisi, ukuphatha izimali nezindlela zokulima nezokufuya ezinhle.
Ngokubambisana neFood and Beverages Manufacturing Sector Education and Training Authority, umasipala wathola uR6.2 million ngo-2024 nango-2025 ukuqeqesha intsha nabantu besifazane abawu-100.
Kulo hlelo lweminyaka emihlanu umasipala watshala uR6.2 million, waxhasa ngoR12 million wezinto zokusebenza nengqalasizinda ovela kwiSmall Enterprise Development and Finance Agency, ohlelweni lonke kwasebenza uR18.2 million.
Lolu hlelo lwalekelela abantu abawu-100 bakwazi ukusungula nokusimamisa amabhizinisi asemalokishini. Kusukela ngo-2021 kuya ngo-2025 kutshalwe ngaphezu kwangoR20 million kwingqalasizinda nangaphezu kwangoR32 million kwi-Farmer Skills and Enterprise Development Programme.