Umenzi kapende wekhethelo uhlabane ngoR1 million kwiKasi SME National Pitch Challenge
YINTATHELI YOMBELE
IBHIZINISI elenza upende eSoshanguve, eGauteng, iMaduwa Paint World lidle umhlanganiso lahlabana ngoR1 million emncintiswaneni wamabhizinisi asemalokishini iKasi SME National Pitch Challenge obuseGqeberha, eMpumalanga Kapa, ngoLwesine.
I-Kasi SME National Pitch Challenge yasungulwa yiStandard Bank ukuphucula amabhizinisi asemalokishini. Indikimba yalo nyaka ibithi “Commercialising Kasi: Unlocking Competitive Township Businesses”, okusho ukuvula amathuba okuthi amabhizinisi asemalokishini akhule futhi ancintisane emakethe.
Inhloko ye-Enterprise and Supplier Development eStandard Bank Business Banking uNkk uNaledzani Mosomane ithe amabhizinisi angenele umncintiswano walo nyaka akhombisa ukuthi ayanda amathuba amakhulu okukhula eNingizimu Afrika.
Uthe lo mncintinswano ukhombise ukuzimisela, ukubekezela nobuchule obukhona kosomabhizinisi basemalokishini ezindaweni ezihlukene zaseNingizimu Afrika.
“Uhlobo lwamabhizinisi obelukhona lukhombisa ukuthi osomabhizinisi baqala amabhizinisi akwazi ukukhula, akhe amathuba omsebenzi axazulule izinkinga imiphakathi ebhekene nazo futhi abenegalelo ekukhuleni komnotho,” kusho uNkk uMosomane.
IMaduwa Paint World ihlabe amajaji umxhwele ngendlela ekhule ngayo, umbono wayo wokukhiqiza, indlela engenza ngayo inzuzo namathuba okudala imisebenzi yesikhathi eside.
Umsunguli weMaduwa Paint World uMnu uRodney Maduwa uthi ibhizinisi lakhe selikhule kusukela ekubeni yibhizinisi ebelisebenzela emjondolo ongamamitha amahlanu, laba ngelenza opende nama-coating ezifundazweni ezihlukene.
Leli bhizinisi lenza upende wokuhlobisa nowezimboni, phecelezi industrial coatings. Linezinhlelo zokwakha indawo ezokwenza i-acrylic emulsion ezweni, okuyinto engasiza ekunciphiseni ukuthembela kwizithako zaphesheya.
FUNDA NALAPHA: https://www.umbele.co.za/2025/08/29/owasentshonalanga-kapa-uhlabane-ngor200-000-kwi-kasi-sme-summit/
Amajaji abone ukubaluleka komsebenzi waleli bhizinisi ukwandisa ukukhiqiza ezweni, ukwakkha imboni yaseNingizimu Afrika, ukudala amathuba omsebenzi nokukhulisa amabhizinisi abantu abamnyama emkhakheni wezokukhiqiza.
Leli bhizinisi liqale lanqoba esigabeni sesifundazwe eGauteng ngaphambi kokudlulela kowamanqamu esigabeni i-Viewers’ Choice.
Uhlu lwabawinile:
Phambili kuwine i-Ezempilo Primecare Clinic kaNks uSisanda Potye, isibili kwabayiPSD Scent Perfumes kaNks uPhumulile Mkhonza.
Amajaji abheke izinto ezihlukene ngaphambi kokukhetha ibhizinisi elinqobile, okubalwa kuzona indlela umsunguli webhizinisi aqhuba ngayo ibhizinisi, ukuthi lingakwazi yini ukwenza inzuzo, lingakhula kangakanani, amathuba akhona emakethe, ukusimama ngokwezimali nomphumela elinawo emphakathini.
U-R1m kulindeleke ukuthi isize leli bhizinisi lisheshise izinhlelo zalo zokukhula, likhulise ukukhiqiza, liqashe ezinye izisebenzi futhi liqinise indawo yalo emakethe yasekhaya neyomhlaba.