Isikhwama esingakhokhele umfelokazi sesibikwe kwiFinancial Sector Conduct Authority
YINTATHELI YOMBELE
USHAQEKE wabikela umXazululi wezinKinga zemPesheni umfelokazi oyalelelwe yisikhwama sempesheni ukuthi uzothola uR6 000 kuphela emalini yomyeni wakhe obesesebenze iminyaka engaphezu kwewu-40 enkampanini eyodwa.
Iphini lomXazululi wezinKinga zemPesheni uMnu uNaheem Essop lithe udaba lesisebenzi ebesiyilungu lePaper, Printing, Wood and Allied Workers Union Pension Fund, selinesikhathi lizama ukuluxazulula kodwa abaphathi balesi sikhwama abaphenduli.
Uthi umyeni womfelokazi washona ngomhlaka-6 Agasti wango-2023 kanti lo mfelokazi ubeloku ezama ukuthola imali yomyeni wakhe kodwa engayitholi.
Uthi kwale ngisho eseveze izincwadi ezikhombisa ukuthi wuye osengamele izindaba zikamufi kodwa lesi sikhwama asimniki imali.
FUNDA NALAPHA: https://www.umbele.co.za/2025/09/25/kuphele-amahlathi-okucasha-esikhwameni-sempesheni-ebesigweva-nemali-yesisebenzi-esashona/
Umfelokazi uveze ukuthi emva kokuthumela yonke imininingwane edingeka uma kushone ilungu lesikhwama sempesheni akaze ayithole impendulo kulesi sikhwama, kunaloko kunomsebenzi waso owacela ukuhlangana naye edolobheni wamnika incwadi ethi uzothola uR6,000.56. kuphela.
Emva kokuthola le mpendulo ubikele umXazululi wezinKinga zemPesheni. Umxazululi uzamile ukuthola ukuthi kwenzekani ngalolu daba kodwa abaphethe isikhwama abazange baphendule.
U-Essop ube eseyalela lesi sikhwama ukuthi sikhokhele umfelokazi imali yomyeni wakhe ekupheleni kwale nyanga futhi wasibika kwiFinancial Sector Conduct Authority, elawula izinkampani ezisebenza ngemali, ukuze isihlawulise futhi iqinisekise ukuthi silandela imithetho efanele ngokukhokhela amalungu aso imali.
Kuzokhumbuleka ukuthi ngonyaka odlule iHhovisi lomXazululi wezinKinga zemPesheni labika ukuthi lithole izikhalo eziwu-10 331 kumalungu ezikhwama zempesheni.
Lithe bawu-5 830 abaqashi abangayidluliseli esikhwameni sempesheni imali abayibamba emaholweni ezisebenzi zabo ngezinsuku eziyisikhombisa ezibekiwe.
U-Essop uxwayise abaqashi abangayidluliseli imali esikhwameni sempesheni ngokuthi bazojeza nabaphathi bezikhwama abaziba ihhovisi lakhe ngoba ulwela abantu abangenayo imali yokugqigqa ezinkantolo nabameli ababizayo.