‘Ungavumeli imali ikushintshe’
Kuleli sonto kuSAZIWAYO NEMALI sixoxa noLwandle Masoka, umsakazi weGagasi FM wohlelo i-Saturday Breakfast olungena ngoMgqibelo ngo-6 kuya ku-9 ekuseni ne-Early Risers engena ngeSonto ngo-4 kuya ku-6 ekuseni
WUSIMANGALISO NTSHANGASE
Usemncane wawuphiwa yini imali?
Yebo ngangiphiwa.
Waqala nini ukuba ne-akhawunti yasebhange, wayivula kuliphi?
Ngaqala sengenza uMatikuletsheni, ngayivula eStandard Bank.
Ekukhuleni kwakho, yini oyikhumbulayo nowayifunda ngemali?
Wukuthi ngafundiswa ukonga nokusebenzisa imali ngokucophelela.
Waqala nini ukusebenza kanti kwakuyimalini umholo wakho wokuqala?
Ngaqala ngineminyaka ewu-15, ngisebenza eNandos, ngihola ngokomsebenzi engiwenzile.
Wawenzani umholo wakho wokuqala?
Ngawunika umama ukuthi angibekele wona futhi kube wuye onqumayo ukuthi ngenzani ngawo.
Yini into enhle ongathi usuke wayenza ngemali?
Wukuthenga iselula engangiyifuna futhi ngathenga nemoto.
Yiliphi iphutha elithinta imali osuke walenza?
Wukusebenzisa imali budlabha.
Wake walutheka mhlawumbe ngokudlala ibhanoyi?
Cha angikaze.
Yisiphi iseluleko esihle owasithola ngemali?
Esokuthi kumele ngisebenze kanzima ukuze ngibe nemali nokuthi akumele ngilindele ukuyithola noma ngiyiphiwe ngomunye umuntu.
Uma ungawina uR1 million kwioLotto ungawusebenzisa kanjani?
Ngingaqala ibhizinisi lokucwala izinwele ukusiza ukubeka imali eyoba yifa lendodakazi yami.
Ungabeluleka uthini abanye abasemkhakheni wakho ngokuphatha imali?
Ngokuthi abangavumeli ukuthi imali ishintshe uhlobo lomuntu abayilona. Abazi ukuthi njengoba sayifica la emhlabeni, sizofa futhi siyishiye khona, ngakho asingavumeli ukuthi isenze sibukele abanye abantu phansi.
