Ibhange lomBuso lingase liyehlise imalimboleko- osomnotho 

YINTATHELI YOMBELE 

UKWEHLA kwesilinganiso samandla emali esuka phakathi kwango-6% no-3% kungenza ukuthi iBhange lomBuso liphinde liyehlise imalimboleko kusasa uma selimemezela isinqumo salo. 

Basho kanje osomnotho baseFNB oNkk uMamello Matikinca-Ngwenya noMnu uSiphamandla Mkhwanazi ngabakulindele ngomhlangano wesigungu esiphezulu esithatha izinqumo ngamandla emali kwiBhange lomBuso.

UNkk uMatikinca-Ngwenya uthe balindele ukuthi iBhange lomBuso lehlise imalimboleko ngoba libonakale liziziba izinkinga ezinyusa amandla emali ezingalawulwa yiNingizimu Afrika ngesikhathi lehlisa imalimboleko isuka esilinganisweni esiwu-8,24% ngo-2024, ifinyelela ku-6,75% ekupheleni kwangonyaka odlule. 

UMkhwanazi uthi lesi sinqumo sizobe sihambisana namandla emali asewu-3,6% kodwa ngeke babenesiqiniseko ngoba iBhange lomBuso libuye lithande ukunswinya abantu.

Uthe: “Akukho okutheni okuzovimba iBhange lomBuso ukuthi lehlise imalimboleko kodwa libuye liqinise isandla uma linquma ngayo. Kuzocaca kusasa ukuthi ikomiti elithatha izinqumo ligcina linquma ukwenzani.” 

FUNDA NALAPHA: https://www.umbele.co.za/2025/12/23/izinguquko-ezenzeka-eningizimu-afrika-zigqugquzela-abatshalimali-ibhange-lombuso/ 

Usomnotho wase-Investec uNks u-Annabel Bishop uthe njengoba irandi liloku liqina uma liqhathaniswa nedola laseMelika iBhange lomBuso lingase libenesizathu sokwehlisa imalimboleko. 

Yize ebona kanjalo uthe iBhange lomBuso lizoqhubeka nokubheka uma lenza izinqumo zalo njengoba engalindele ukuthi liyehlise kakhulu imalimboleko. Ubalule ukuthi okwenzeka eMelika kuvamise ukubanomphumela omuhle ezinqumweni zaseNingizimu Afrika futhi nakhona ubona lehlisa imalimboleko. 
Uphethe ngokuthi babona imalimboleko yehla ngaphezu kwango-50 basis points kulo nyaka kodwa loko kuncike ezintweni ezenzeka emnothweni womhlaba nangezinqumo ezenziwa yiMelika ngentela yezimpahla eyikhokhisa izimpahla zakwamanye amazwe ezidayisa khona.