Uzobamnandi uKhisimusi eNingizimu Afrika kwehliswa imalimboleko
WUTHOBILE ZWANE
ABANTU baseNingizimu Afrika bazobanoKhisimusi omnandi emva kokuthi amalungu eBhange lomBuso athatha izinqumo ngemalimboleko evote ngo-elethu ukuthi yehle ngo-25 basis points.
Loku kusho ukuthi isiwu-6.7%, kuthi i-prime lending rate, inzalo amabhange aboleka amakhasimende ngayo, yona ibewu-10.25%.
Umphathi weBhange lomBuso uMnu uLesetja Kganyago uthe bavumelene bonke ngokwehlisa imalimboleko ngesikhathi enza isimemezelo ePitoli, eGauteng, izolo.
Uchaze ngesikali esisha samandla emali esesiwu-3% njengoba singeke sisalinganiswa phakathi kwango-3% no-6%.
“Ithimba elenza izinqumo ngemalimboleko livumelene ngokuthi asisekho manje isidingo sokuqinisa isandla njengoba namandla emali engekho endaweni embi. Sivumelekile ukuthi sibekezele uma amandla emali ewu-2% kuya ku-4% kodwa loko akusho ukuthi sizobuka noma isimo sizoshaya abantu baseNingizimu Afrika,” kusho yena.
Uthe bazoqinisekisa ukuthi bachazela abantu ngendlela abazoyiqonda ngezinqumo zeBhange lomBuso zangomuso.
FUNDA NALAPHA: https://www.umbele.co.za/2025/09/19/ibhange-lombuso-ligcine-imalimboleko-ku-7/
Isazi somnotho uSolwazi uBonke Dumisa sithe siyajabula futhi besisilindele lesi simemezelo ngoba sihle kubantu baseNingizimu Afrika.
“Lezi yizindaba ezimnandi eNingizimu Afrika. Abanye abantu bathi yehle kancane imalimboleko futhi babuza ukuthi izokwenza mehluko muni? Kodwa yenza umehluko omkhulu kubantu abakhokhela imizi. Kubantu abadonsa kanzima umehluko uzobonakala ngoba kunemali ezokwehla kwabayikhokha nyanga zonke yezikweletu ezihlukene. Iyasisiza kakhulu thina esihluphekayo,” kusho yena.
Inhloko yeMacroeconomic Research eStandard Bank Group South Africa uDkt u-Elna Moolman ithe lesi sinqumo besilindelwe ngamehlo abomvu ngenxa yokushintsha kwesikali samandla emali. Uthe bebekulindele ukuthi iBhange lomBuso lehlise imalimboleko.
Uthe umphumela walesi sinqumo uzocaca kahle ezinyangeni eziwu-12 kuya kweziwu-18 ezizayo.
Uphethe ngokuthi ngonyaka ozayo imalimboleko ngeke yehle kuyo yonke imihlangano, yize belindele ukuthi yehle kweminye.
Umkhulumeli womfelandawo wezinyunyana iCongress of South African Trade Unions ePhalamende uMnu uMatthew Parks uthe bayajabula ukuthi iBhange lomBuso lisilalelile isicelo sokwehlisa imalimboleko.
Uthe ukwehla kwayo kuzokwehlisa umthwalo wezikweletu ezisebenzini ezikhokhela izindlu, izimoto, ezithenga ukudla, uphethroli nezinye izidingo zempilo.
U-Parks uphethe ngokuthi lesi sinqumo sizokwenza izisebenzi zikwazi ukuthenga izidingo zemindeni yazo ngoKhisimusi, okuyinto ezokhulisa umnotho futhi iCosatu ifisa ukuthi nangonyaka ozayo yehle imalimboleko.