Kwethulwe isikhwama sikaR100 million sokuthuthukisa osozimboni kwezolimo
YINTATHELI YOMBELE
U-R100 million othulwe engqungqutheleni yemboni eshintsha imikhiqizo yezolimo ibengokunye ebiseMidrand, Gauteng, uzosiza izimboni zabantu abamnyama.
Le mali izosiza osozimboni abasebenza ngenyama yenkukhu, ebomvu, insangu, abafuye ofishi, abatshala izithelo, amaveji nezimbali engadini.
Lo R100m uzohlukana kabili. Kuzoba wu-30% ozoba yimali yomxhaso no-70% ozoba yimali ebolekisayo. Ukushintsha imikhiqizo yezitshalo ibengezinye izinto kungenisa uR78 billion emnothweni waseGauteng nowezwe noma u-5.2% wayo yonke imali engenayo kuleli zwe.
Uzokhishwa yiNational Empowerment Fund (iNEF) ibambisene nomNyango wezoLimo nokuThuthukisa iziNdawo zasemaKhaya eGauteng.
Le ngqungquthela ebiyizinsuku ezimbili isebenza njengenkundla enamandla yokuxhumanisa osozimboni, izikhungo zemali nongoti kwezolimo ukuze bakwazi ukuqhuba ibhizinisi nokwenza izivumelwano ezintsha.
Ungqongqoshe womNyango weziMali nokuThuthukisa umNotho eGauteng uMnu uLebogang Maile uthe lo mkhakha ubaluleke kakhulu ekukhuliseni umnotho wesifundazwe.
Ungqongqoshe womNyango wezoLimo nokuThuthukisa iziNdawo zasemaKhaya eGauteng uNks uVuyiswa Ramokgopa uthe: “Le ngqungquthela ayiwona nje umcimbi kodwa iyisu elizoshintsha umnotho othinta ukudla kwaseGauteng. Loku kuzokwenzeka ngokusebenzisana nokuthatha izinqumo ezibalulekile, sizoyishintsha imboni eshintsha imikhiqizo yezolimo ukuze ikwazi ukubanazo zonke izinhlanga zakuleli zwe, ikhiqize imikhiqizo elungele ukudayisa kwamanye amazwe futhi idale imisebenzi. Isikhwama esisithule neNEF sikhombisa ngokusobala ukuthi sizibophezele ekuletheni ushintsho.”
Isikhulu esiphezulu seNEF uMnu uMzi Dayimani sithe: “Asiyiboni nje imboni yokushintsha imikhiqizo yezolimo njengesinye isigaba somkhakha wezolimo kodwa siyibona njengesu lokuhlanganisa izimboni, ukuvuselela izindawo zasemakhaya nokuzimela kosoimboni abakhiqiza ukudla.”
Isikhwama sesithole izicelo eziwu-188, eziwu-32 ezinako konke okudingekayo neziwu-18 ezisacutshungulwa. Ngaphandle kokusiza ngemali, isikhwama sizolekelela osomabhizinisi ngokufanele bakwenze kungakafiki imali futhi kuzothi noma isifikile balekelelwe ukuze baphumelele.