Basike iphethini kubazali babo abenza ibhizinisi lokuthutha ngendlela yesimanje. Omunye wabo uxoxe noTEBOGO MOKWENA
UKUKHULISWA ngabazali abebesembonini yezokuthutha kubakhuthaze ukuthi bangene kule mboni benze ngeyabo indlela. UMnu uCalvin Ntlatlana nodadewabo uNkk uGopolang Makgotho basebenzisa isipiliyoni namakhono abawafunde kubazali babo ukukhulisa ibhizinisi labo iCalvino’s Shuttle Services.
UNkk uMakgotho, isikhulu esiphezulu senkampani, uthi ibhizinisi baliqale ngo-2020 eSekhukhune, eLimpopo.
Inkampani yabo ithutha abantu abavakashela izindawo ezihlukene ezweni nakwamanye amazwe njengeMozambique. Iqashe abantu abathathu abasebenza ngokugcwele noyedwa oyitoho.
Uthi ukhule ebona abazali bakhe benebhizinisi lamatekisi kanti kuningi akufunda ngokubabuka. Abazali bakhe babeliqale ngo-1978 ibhizinisi kanti kwathi uma kushona uyise ngo-2006, unina waqhubeka nebhizinisi kuze kube yimanje.
“Ubaba wayesebenza ethela upethroli kanti umama wami wayehlanza amabhilidi, bonga imali bayisebenzisa ukuqala ibhizinisi.
“Ngangingasebenzi ebhizinisini okutheni ngisemncane kanti empeleni kubona bonke engizalwa nabo, yimina kuphela oke wasebenzela uhulumeni. Bonke abafowethu babesebenza ebhizinisini kusukela bebancane kanti nanamhlanje basasebenza kulona,” kulanda yena.
UNkk uMakgotho uthi ufunde ukondla umndeni wakhe ngebhizinisi kanti nalo liyabanakekela. Uthi yize ibhizinisi linezimoto ezintathu nebhasi, uthi bekungelula ukufinyelela lapho. “Siqale singenamali, sasebenza saze sakhuphuka.”
UNkk uMakgotho uthi ufisa ukusebenzisa ibhizinisi ukufundisa intsha ukuthi iphucule impilo yayo. “Abantu bakithi bayasaba ukukhula kanti bacabanga ukuthi ukuqashwa yiyona kuphela indlela yokungenisa imali. Kufanele sifunde izinto ezintsha, sivule amabhizinisi futhi sinakekele izwe lethu.”
Uthi into enkulu abaziqhenya ngayo yindlela abaphatha ngayo amakhasimende. “Ngaphandle kwayo, ngabe asikho lapho sikhona manje futhi ngabe asikhuli ngale ndlela esikhula ngayo manje.
“Isifiso sethu wukukhula size sifinyelele lapho singavula khona amagatsha ezweni lonke, sandise isibalo sabantu esibaqashile.”
- Lolu daba luqale lwashicilelwa ku: www.vutivi.business.co.za