IChweba laseThekwini libuyele ekuthutheni umbila

INTATHELI YOMBELE

KUQOPHEKE umlando eChwebeni laseThekwini ngenkathi libuyela ekuthutheni umbila oya phesheya. Ngemva kokugcina ngoDisemba wango-2023, eMaydon Wharf Agribulk Terminal kulayishwe umkhumbi oya phesheya.

Kulayishwe umthamo owu-40 000 ton wombila oya phesheya kwiMV Chang Hang Hong eVietnam.

Imenenja yeMaydon Wharf Agribulk Terminal uNks uSihle Mpungose uthe: “Sikhuthazekile ngesivuno esihle esilindeleke ngo-2026 nokubambisana esinakho nemboni (yezolimo). Kunika ichweba ithuba lokuthutha umthamo omningi wombila.”

Uthi ukugxila ekulungiseni nokuphucula ichweba kwandise amandla alo okwenza umsebenzi othembekile. Kusanda kulungiswa ibhande lendawo yokulayisha imikhumbi, kwalungiswa kubuchwepheshe obusebenza nge-remote nendlela yokususa uthuli.

FUNDA NALAPHA: Zihamba kahle izinhlelo zikamasipala neTransnet zokuphucula ukusebenza echwebeni

Usomnotho omkhulu we-Agricultural Business Chamber of South Africa uMnu uWandile Sihlobo uthe nakuba izimvula zilethe izinselelo kwezinye izifunda kodwa ukuthutha izimpahla ziya phesheya kuzoqhubeka ngamandla nesidingo sezimpahla.

“Leli chweba limi ngomumo ukuthutha umthamo omningi ngalesi sikhathi. Silanda umbila emibhoshongweni, uhambe ngebhande, siwufake emkhunjini endaweni yokulayisha owu- 350 ton ngehora ngezinsuku ezinhlanu noma eziyisithupha ngamaphasela awu-40 000 ton,” kusho uNks uMpungose.

Njalo ngonyaka iNingizimu Afrika ithutha umbila owu-2.4 million uya kakhulu eZimbabwe, eBotswana, Eswatini, eNamibia, eVenezuela, eSouth Korea, eTaiwan naseVietnam.