IHhovisi lomCwaningimabhuku-Jikelele lisivale ngophakathi isikhala
WUSLINDILE KHANYILE
OBEYIMBAMBA lephini lomcwaningimabhuku-jikelele kusukela ngoFebhuwari useqokwe ngokugcwele. IHhovisi lomCwaningimabhuku-Jikelele limemezele izolo.
UNks uBongi Ngoma ungowesifazane wesibili ukuphatha lesi sikhundla kulesi sikhungo esigubha iminyaka ewu-115 sasungulwa. Owokuqala kwaba wuNk uTsakani Maluleke, umcwaningimabhuku-jikelele.
Ngaphambi kokuqokelwa kulesi khundla, uNks uNgoma ubeyisikhulu esengamele uphiko i-National Audit kulesi sikhungo. Wafika kulolu phiko ngo-2012, kwathi ngo-2015 waqokwa wayisikhulu esengamele izimali, okwaholela ekutheni ngo-2021 aklonyeliswe ngomklomelo i-CFO of the year and Public Sector CFO of the Year Award.
UNks uNgoma uneminyaka engaphezu kwewu-20 eyi-chartered accountant kanti waqala ukusebenza e-Ernst and Young, wase edlulela e-Industrial Development Corporation.
Ephawula ngalesi sinqumo, uNks uMaluleke uthe: “Sijabule kakhulu ukubanomholi ofana noNks uNgoma othatha lesi sikhundla ngonyaka omqoka lapho sigubha khona iminyaka ewu-115 yokucwaninga amabhuku eNingizimu Afrika.
“Siyaziqhenya futhi nangokuthi kuqokwe umuntu ongaphakathi ovele eyingxenye womsebenzi weqhinga lethu lokushintsha izinto ngo-2030. Nginethemba lokuthi nguyena umuntu ofanele ukusisiza siqhubeke nokwenza umsebenzi wethu njengokusho komThethosisekelo,” kusho yena.
Eminyakeni emine edlule, uNks uNgoma wake waxoxa noMbele ngokusuka nokuhlala kwempilo yakhe nokuthi wangenea kanjani kulo mkhakha.
Lo mholi odabuka kuTsolo, eMpumalanga Kapa, wafunda eNatal University, esiyiNyuvesi yaKwaZulu-Natali.
Ngesikhathi ekhuluma ngomsebenzi wakhe, wathi: “Uma ngizocwaninga amabhuku, angilona iphoyisa kodwa yiyona ndlela yokuthi nami ngivikele intando yabantu. Sonke sifuna into eyodwa…kunciphe abantu abathembele ezibonelelweni, izibhedlela ezisebenza kahle futhi wonke umuhtu azimele. Sinezindlela ezihlukene zokukwenza lokho.”