Izibalo zesikali somkhiqizo wezwe zizokhombisa umphumela kawoyela

INTATHELI YOMBELE

KUSASA iStatistics South Africa izoshicilela izibalo zesikali somkhiqizo ezweni zekota yokuqala yonyaka.

I-Bureau for Economic Research (iBER) ilindele ukuthi sikhule ngo-0,3% uma kuqhathaniswa ikota nekota, nakuba ithuluzi lethu likhombisa ukuthi izobangaphansi kwalesi silinganiso.

Okuningi kuzoncika ekuhwebeni komkhakha wezolimo nokubuyekeza izibalo ezindala.

Okubalulekile wukuthi lezi zibalo ezangaphambi kokuthi impi eseMiddle East iholele ekukhuphukeni kukawoyela.

Kwezinye izibalo ezizophuma kuleli sonto kukhona i-FNB/BER Building Confidence Index,(iBIC), ezokumbiwayo nezomkhiqizo, ezizokhombisa ukuthi kuhamba kanjani emnothweni uma kubhekwe kwikota elandelayo.

I-BCI yehlele ku-39, iphuzu elingaphansi kwesilinganiso sesikhathi eside. Ithemba lehlile emikhakheni emine kwemihlanu ngenxa yabathengi bezimoto ezintsha.

I-Absa Purchasing Managers Index (iPMI) yehlile isuka ku-52,6 ngo-Ephreli yaya ku-50,8 ngoMeyi ngenxa yokwehla ekukhiqizeni, okubangelwe wukwehla kwama-oda okuthenga ango-Ephreli.

Ukubuka izinyanga eziyisithupha kulethe ithemba, izibalo zokuhweba zasuka ku-47,4, zaya ku-52,9, okusho ukuthi abakhiqizi balindele ukuthi izinto zibengcono ngasekupheleni konyaka.

I-S&P Global PMI yehlile isuka ku-51,6 ngo-Ephreli yaya ku-49,6 ngoMeyi, okubewukwehla kokuqala ezinyangeni ezintathu. Loku kwenziwe wukwehla emkhiqizweni nama-oda amasha, okubekuhambisa nokwehla kwesidingo sezimpahla nokunyuka kwezindleko zokukhiqiza ezidluliselwe kumakhasimende.

Okubekuhle wukunyuka kwezibalo zabantu abaqashwe yizinkampani kusukela ngo 2022. Ngaphezu kwaloko kulindeleke ukuthi kunyuke uhwebo ezinyangeni eziwu-12 ezizayo.

Ukuthenga izimoto ezintsha kuqhubekile nokunyuka, kwasuka ezimotweni ezintsha eziwu-47 900 ngo-Ephreli kwaya kweziwu-51 100 ngoMeyi. Ngonyaka loku kunyuke ngo-12,8% ngoMeyi, okwehle kancane ku-13% ngo-Ephreli.

Ukuthenga kunyukile ngezinyanga ezimbili zokuqala uma kuqhathaniswa nangekota yokuqala, okusho ukuthi lo mkhakha uzoqhubeka nokukhula okwesishiyagalombili izinyanga zilandelana.

Ngakolunye uhlangothi, izibalo zezimoto ezidayisa phesheya kuqhubekile nokwehla, kwaze kwafinyelela ku-4,8% uma kuqhathaniswa unyaka nonyaka ngenyanga edlule.

Izibalo zokudayisa amabhasi namaloli amancane phesheya kwehle kakhulu, kanti iNaamsa ithe kubangelwe wukukhiqiza izimoto ezintsha komdayisi omkhulu. Loku kukhombisa ukuthi zizothwala kanzima ngenxa yesimo sezimali samakhasimende. – Le mininingwane ithathwe kwiBureau for Economic Research