I-Sars izodla izimpahla zezisebenzi zayo ezilahlwe ngamacala YINTATHELI YOMBELE
UTHELA izithelo ezinhlelo umkhankaso womqoqintela iSouth African Revenue Service (iSars) wokuqeda inkohlakalo i-Illicit Economy Strategy.
Izolo ukhomishana omusha weSars uthe inkantolo ibagunyaze ukuthi badle izimpahla zezisebenzi zayo ezasula emsebenzini ngo-2024 nangonyaka odlule.
Le ncwadi yokudla izimpahla zalezi zisebenzi inikwe iSars yiNkantolo eNkulu ePitoli ngaphansi kwesigaba 163 somthetho i-Tax Administration Act. I-Sars yaya enkantolo nobufakazi obuqanda ikhanda obuveza ukuthi lezi zisebenzi azizange ziyilandele imithetho yentela, okubalwa umthetho wokulwa nokushushumbisa imali, inkohlakalo, ukusebenza zingagunyaziwe yiSars, ukuphula umthetho ovikela izimfihlo zeSars nokusebenzisa izimpahla zikahulumeni ukwenza inkohlakalo.
Inkantolo inike iSars incwadi eyigunyaza ukuthi idle izimpahla zalezi zisebenzi, okuyimizi emithathu, izimoto eziyisithupha nezimali ezitshalwe emabhange nakuma-akhawunti ahlukene. Ngaphandle kwezimpahla ezibalwe yiSars umlawuli oqokiwe ukungamela lolu daba ugunyazwe ukuthola ezinye izimpahla okungenzeka ukuthi zifihliwe.
Izimpahla ezizodliwa zibiza izigidi zamarandi kanti abanikazi bazo abanalungelo lokuzidayisa njengoba sezingaphansi kweso lomlawuli. Wumlawuli kuphela onelungelo lokuzidayisa ukuze athole imali yentela abayikweleta iSars.
FUNDA NALAPHA: INingizimu Afrika ilahlekelwa wuR3.6 billion ngenxa yodizili owumkokotelo – iSars
Esitatimendeni, ukhomishana weSars uDkt uJohnstone Makhubu uthe inkohlakalo eyenzeka kumqoqintela izosukunyelwa kulandelwa umthetho.
“Izisebenzi ezikhohlakele zeSars noma ngabe ezisebenza manje noma esezisulile zisebenzela phansi. Zenza umphakathi ungasithembi, ziphazamise nokusebenza kwezinhlelo zethu. Inkohlakalo yazo iphazamisa umsebenzi kahulumeni wokusiza bantu,” kusho yena.
Ubalule ukuthi incwadi yasenkantolo ikhombisa ukuzibophezela kweSars ekuthatheni izinqumo ezifanele.
“Siyayilandela yonke imali ekhwabanisiwe, sithatha izimpahla zabakhohlakele futhi konke sikwenza ngokushesha silandela umthetho. Akekho ongaphezu komthetho, ikakhulu esithembele kubonw ukuthi bawenze usebenze,” kusho uMakhubu.
Uhlelo lokuqeda inkohlakalo eSars luhambisa nezinhlelo zikamengameli uMnu uCyril Ramaphosa zokuphazamisa umnotho wezigebengu ngokuqeda inkohlakalo nobugebengu kumqoqintela nangaphandle.
UMakhubu ubonge izisebenzi zeSars nezakhamuzi zaseNingizimu Afrika eziceba abenza ubugebengu. Uqinisekise ukuthi bazoqhubeka nokulandela imali ukuze kujeze abanye njengoba uphenyo lusaqhubeka.
“Sicela abantu basibikele uma kukhona izisebenzi zethu ezenza inkohlakalo ethinta intela nasemingceleni. Siphelile isikhathi sokuthi izisebenzi ezenza ubugebengu zibalekele amacala azo ngokusula emsebenzini. Abazitshela ukuthi bazokwenza loku kufanele bazi ukuthi bazolandelwa, bavunjululwe lapho becashe khona,” kuphetha yena.