Abasikingqephu bashiyelane inkundla, bagoduka nendathane yemiklomelo. INTATHELI YOMBELE iyabika
IMBONI yemfashini ihlale ihlomula kwiDurban Business Fair (iDBF). Kube njalo nakwiDBF yalo nyaka ebise-Inkosi Albert Luthuli International Convention Centre (e-ICC), ephothulwe izolo.
Ngale kokukhangisa ezindaweni zemfashini, osomabhizinisi bemfashini bathole ithuba lokumodela eshashalazini ukukhangisa ngengqephu yabo kwiDurban Fashion Fair (kwiDFF) kusukela ngoLwesithathu.
Inkundla ivulwe yilebuli entsha iZulu Madame, eyenza ingqephu kanokusho egqize ngemibala yesiZulu eyenzelwe owesimame wamanje. IZulu Madame, esungulwe wuNks uZodwa Msimang kaNsibande, yethulwe ngonyaka odlule. Uthe kube yintokozo ukuvula umbukiso kanti ubonga uMasipala waseThekwini.
“Yithuba elihle kithina basiki bengqephu. Sithole ithuba lokukhangisa ngemisiko yethu emisha, yabantu abasha enesitayela. Sifisa ukuheha izitolo ezinkulu,” kusho yena.
Abakhangise ngosuku lokuqala wuNkosana weBeez Couture, iYatsar ka-Isicelo Dlezi, iNontsasa Fashion House, iVictor Fashion Kingdom, iRoyal Moosh Clothing, iVyagor Louvre, iMotherboard Project, iTempracha, i-Eullue, iLutleigh, i-Azee Tanzi, iKangol, iZaviar, iLEMFVX and Siga Jeans kaPaledi, okhangise izimpahla zakhe ngoqweqwe lomsakazi we-Ukhozi FM uDudu “Lady D” Khoza.
Abakhangise ngosuku lwesibili yi-Indoni Fashion House, okhangise izimpahla zakhe ngombhali wezincwadi uDudu Busani-Dube, wodumo lukaHlomu.
UKwenzi Nkomo, umsunguli we-Indoni Fashion House, ubonge iDFF ngokumsiza ukwakha igama.
“I-DFF ingakhile. Kusukela ngo-2014 ngikhangisa izimpahla zami. Iyinkundla yokwethula nokukhangisa ngengqephu yami entsha. Amakhasimende ami aseyazi ukuthi kufanele alinde iDFF minyaka yonke ukuze abone ukuthi ngiquketheni.”
Enye ingqephe kube yiCherish kaCarita, iSouth Coast Designers, i-Enhle Babes Couture, iKaren Monk-Klijnstra, iSM Creations, i-iEYC Couture, Libo Creations, uTreasure Cindi neSistas Felas.
I-DFF, exhaswe yiMac, iRJ Relay Jeans ne-Edgars, ivalwe ngama-DFF Awards ngoMgqibelo.
Odle umhlanganiso we-Fashion Award uwine uR10 000, kwathi owine i-Model Award wahlabana ngoR5 000. U-Duke “Clothe Your Soul” uwine iBest Men’s Wear Collection, uTreasure Cindi wawina iBest Ladies Wear Collection. U-Enhle Babes Couture uwine i-Emerging Durban Designer, Indoni Fashion House iwien iFashion Business Award.
KwiDFF 2022 New Face Model, uLungelo Buthelezi udle umhlanganiso kwiBest Male, uNokwazi Makhathini wawina iBest Female kwathi uZandile Mande wawina iPlus Size Award.
I-Fashion Innovator of the Year ihambe noMartin Steenkamp. USiyabonga Nzuza uwine iDFF 2022 Rising Star Award, uDineo Khumalo walala isibili kwathi uSanelisiwe Sikhosana waphuma isithathu.
I-DFF 2022 Collection of the Week iwinwe yiYatsar, kwathi iDFF Designer yawinwa wuDuke “Clothe Your soul”, iHouse of St Luke noTreasure Cindi, bawina uR5 000 eyedwa.
Indoni Fashion House iwine iDesigner of the Year, yagoduka noR15 000.