Kuphelile ukulinda imali amalombo kosomabhizinisi baseThekwini
YINTATHELI KAMASIPALA
BUZOPHELA ubunzima bokulandela uMasipala waseThekwini ukukhokhela osomabhizinisi ngomsebenzi asebewenzele wona njengoba ubuholi bawo buzibophezele ukuthi bakhokhelwa ngesikhathi.
Umasipala unezinhlelo zokuphucula izinga lomsebenzi nokuqinisekisa ukuthi bonke osomabhizinisi abathumele amaphepha afanele uma sebeqede umsebenzi bathola imali yabo ngesikhathi.
Esitatimendeni esithunyelelwe abezindaba, umasipala uthi njalo ngesonto usuke ukhokhela osomabhizinisi asebethumele wonke amaphepha adingekayo.
Uthe wonke amabhizinisi amancane athumela imininingwane efanele uma eseqede umsebenzi azokhokhelwa ezinsukwini eziwu-14 kanti amanye akhokhelwa ezinsukwini eziwu-30. Konke loku kwenzeka uma ethumela wonke amaphepha afanele.
FUNDA NALAPHA: https://www.umbele.co.za/2024/10/23/umasipala-wasethekwini-nezinhlelo-ezinqala-zokusimamisa-umnotho-wabamatafula/
Kuvela ukuthi ukukhokhela osomabhizinisi kubuye kuthathe izinsuku ezingaphezu kwezingu-30 ngenxa yokungagcwaliseki kahle kwamaphepha afanele, ukungafaki wonke amaphepha, ukungalandeli imithetho ethile nokuphikisa into ethile
Umasipala uzoqinisekisa ukuthi osomabhizinisi bakhokheleka ngokushesha njengoba sebekwazi nokuthumela imininingwane yokuqeda umsebenzi online.
Loku kuzosiza ukusheshisa ukuthumela amaphepha okuqeda umsebenzi nokuthi abantu bakhokhelwe futhi kunciphise nokuthi abantu baloku behamba beyobuza emahhovisi.
Umasipala uzoqeqesha osomabhizinisi ngohlelo lokufaka imininingwane yokuqeda umsebenzi online.
Kulezi zithangami osomabhizinisi bazofundiswa ngokufaka kahle amaphepha ukuze bagweme amaphutha nokuthi basheshe bakhokhelwe.
Umasipala ugqugquzela osomabhizinisi ukuthi bathumele amaphepha okuqeda umsebenzi ngesikhathi futhi bawathumele wonke ukuze bakhokheleke ngesikhathi.