ITheku linconyiwe ngokuphatha kahle izimali
YINTATHELI KAMASIPALA
IKOMITI elengamele ukusebenza kwezimali zomphakathi iStanding Committee on Public Accounts (iScopa) lincome uMasipala waseThekwini ngokuthula umbiko onayo yonke imininingwane ngokuphatha izimali, ukuthumela izidingo kubantu nokuphatha umasipala.
Lo masipala, oholwa yimeya uMnu uCyril Xaba, ubuvele kwiScopa ngoLwesithathu ukuyochaza ngokwenzeka kuwona.
Usihlalo weScopa uMnu uSongezo Zibi namanye amalungu aleli komiti babonge uXaba nemenenja kamasipala uMnu uMusa Mbhele ngokuthula umbiko ongafihli lutho nokuqinisekisa ukuthi bonke abaphathi abathintekayo bafikile emhlanganweni.
Uthe: “Sesihlangene nobuholi bezinkampani zikahulumeni ezihlukene, iminyango yawo nomasipala abakhulu. Ngokusebenzisana sikholwa wukuthi singenza umsebenzi omuhle,” kusho uZibi.
FUNDA NALAPHA: Umasipala usukumela ubuhixihixi bokukhokhela somabhizinisi
UXaba uthe wazibophezela kumcwaningimabhuku-jikelele ngonyaka odlule ukuthi uzophucula umsebenzi waseThekwini, aveze konke obala futhi aqinisekise ukuthi bonke abaholi bayaziphendulela ngezinqumo abazithathayo.
“Ngathembisa nokuthi ngizophucula ingqalasizinda futhi ngiqinisekise ukuthi okuphakanyiswe wumcwaningimabhuku-jikelele siyakusukumela ngokushesha ukuze uma esecwaninga amabhuku ethu angatholi izinselelo ezifanayo,” kusho yena.
Uthe izincomo zomcwaningimabhuku-jikelele zisemakomitini ahlukene futhi umsebenzi owenziwayo ubikwa nyanga zonke.
Lo msebenzi usuqalile ukuthela izithelo ezinhle, uXaba wathi uMasipala ukwazile ukwehlisa imibandela yomcwaningimabhuku-jikelele yonyaka wezimali wango-2022/23 yasuka kwewu-25 yabawu-13 ngonyaka wezimali wango-2024/25, okusho ukuthi umasipala usebenza kanzima ukuqinisekisa ukuthi ugcina uthola umbiko womcwaningimabhuku-jikelele omuhle.
Okunye okuhle wukuthi umasipala unemali eyanele yokufeza izinhlelo ezikwiSabelomali sawo futhi uqoqa izikweletu ngezinga eliku-94% futhi awukweleti abantu osebenzisana njengabawudayisela ugesi namanzi.
Ubalule nokuthi umasipala uzihambisa kahle izinhlelo zokuthenga izimpahla futhi ukhokhela osomabhizinisi kungakadluli izinsuku eziwu-30.
Ukuqinisekisa ukuthi abasebenzisana nomasipala bathola imali ngesikhathi esinqunyiwe, umasipala uthule inkundla yobuchwepheshe yokufaka ama-invoice, ekwazi ukukhombisa ukuthi inkokhelo isikuphi.
Maduze kuzobanenkundla yamathenda ezokwenza kubelula ukubona izisebenzi zikahulumeni ezenza ibhizinisi nawo.
Loku kulindeleke ukuthi kwehlize okuqhatha umasipala nomncwaningimabhuku-jikelele.
Umasipala uthi uyazilungisa nezinselelo zohlelo lwe-Expanded Public Works Programme. Usebenzisa uphiko lwayo lweCity Integrity and Investigations Directorate ukuphenya nokuqondisa ubugwegwe kwabathintekayo.
Ziqalile nezinhlelo zokubuyisa imali kulabo okutholakale ukuthi bahlomula ngendlela engafanele.
Mayelana nodaba lokunyuka kwemali emosiwe, umasipala uthi loku bekwenziwa wukungalandeli imithetho yokuthenga izimpahla kodwa manje sekusebenza imithetho eqondene nokuthenga izimpahla ezweni.
Uthembise iScopa ukuthi ngonyaka wezimali olandelayo ngeke kubenemali emosekile noma esebenze ngendlela engafanele.
Indaba yokumoseka kwamanzi awu-53% umasipala uthe uyayisukumela ngokulungisa amapayipi, amamitha nenye ingqalasizinda yamanzi nomsebenzi wokulungisa amapayipi iSouthern Aqueduct kaR1.2 billion.
UXaba uthe balungise nepayipi ebeselineminyaka ewu-70 ebeliwu-900mm ubukhulu labayinsimbi nobukhulu obuwu-1 200mm. Leli payipi liqinisekisa ukuphakela amanzi ezindaweni ezisenkabeni yaseThekwini naseningizimu zinamanzi anele.
Uphethe ngokuthi konke okuvele ngesikhathi bexoxa nekomiti bazokusukumela futhi bazoqhubeka nokuphatha kahle.