Kungene uR36.9 billion ngohwebo lwangoFebhuwari 

YINTATHELI YOMBELE  

ZINYUKILE izimpahla iNingizimu Afrika ezidayisela amanye amazwe ngoFebhuwari. Umbiko weSouth African Revenue Service uveza ukuthi izimpahla ezidayisiwe zibewuR168.1billion, izwe lathenga ezikaR131.2bn. 

Loku kwengeze imali engeniswe wukuhwebelana namanye amazwe ngoR36.9bn, okubalwa uhwebo neBotswana, i-Eswatini, iLesotho neNamibia. 

Imali eyengeziwe esingene ngokuhwebelana namanye amazwe kusukela ngomhlaka-1 wangoJanuwari kuze kubewumhlaka-28 wangoFebhuwari walo nyaka iwuR45.4bn, inyuke ngoR3.3bn emalini eyayisingenile ngesikhathi esifanayo ngonyaka odlule.

FUNDA NALAPHA: Uhwebo lwango-Okthoba lungenise uR15.6 billion eNingizimu Afrika

Imali engene ngokudayisa izimpahla uma kuqhathaniswa unyaka nonyaka ewuR168.1bn inyuke ngo-3.0% uma iqhathaniswa newuR163.3bn eyayenziwe ngoFebhuwari wonyaka odlule. Izimpahla ezithengwe kwamanye amazwe zehle ngo-8.4%, zisuka kuR143.1bn ngoFebhuwari wangonyaka odlule njengoba seziwuR131.2bn kulo nyaka.

Uhwebo lwenyanga nenyanga lukhombisa ukuthi iNingizimu Afrika inyuse imali yezimpahla ezidayisa ngaphandle ngo-8.2% noma uR12.8bn isuka kuR155.3bn yabawuR168.1bn phakathi kwangoJanuwari noFebhuwari walo nyaka. 

Eyezimpahla ezithenga kwamanye amazwe yehle ngoR15.7bn noma ngo-10.7% isuka kuR146.8bn, yaya kuR131.2bn ngesikhathi esifanayo.

Phakathi kwezimpahla ezidayise kwamanye amazwe kakhulu kubalwa izimoto ezithutha abantu, ezithwala izimpahla nezamandla. Ukuthenga izimoto ezithwala abantu kwamanye amazwe nezithwala izimpahla kwehlile nokulanda uphethroli kwamanye amazwe kodwa akwehlanga ukuthenga uwoyela ongahluziwe kwamanye amazwe. Ukulungisa amaphutha enzeka kuma-voucher okuthenga nokudayisa izimpahla kuholele ekutheni imali ethe xaxa engene ngoJanuwari yehle ngoR0.8bn yabawuR8.5bn, isuka kuR9.3bn obumenyezelwe ngoJanuwari.