Isazohlala eThekwini i-Africa’s Travel Indaba
YINTATHELI KAMASIPALA
IDOLOBHA laseThekwini lisazoqhubeka nokuphatha umbukiso wezokuvakasha omkhulukazi e-Afrika i-Afrika’s Travel Indaba njengoba kuqinisekiswe ukuthi uzobuya futhi kuleli dolobha eminye iminyaka emihlanu.
Unyaka wokuqala uzoqala ngonyaka ozayo, u-2026, njengoba ithimba laseThekwini ebelinxusela idolobha i-Africa’s Travel Indaba liwaqwaqwade ekhanda amathimba akwezinye izifundazwe.
I-Africa’s Travel Indaba ikhombisa ukuthi idolobha laseThekwini livelele kwezokuvakasha nasekwenzeni imicimbi nezingqungquthela ezisezingeni eliphezulu. I-Africa’s Travel Indaba yangonyaka ozayo izoba ngomhlaka-11 kuya kumhlala-14 wangoMeyi ngonyaka ozayo e-Inkosi Albert Luthuli International Convention Centre eThekwini.
FUNDA NALAPHA: https://www.umbele.co.za/2025/05/15/amabhizinisi-asekzn-i-africas-travel-indaba-ukusabalala/
Iwumbukiso omkhulu wezokuvakasha e-Afrika nonamandla kunayo yonke ohlanganisa abathengi, abakhangisi, abezindaba nababambiqhaza embonini yezokuvakasha abavela kulo lonke izwekazi i-Afrika nangale kwalo. Lo mbukiso wezohwebo uyinkundla ebalulekile yokusimamisa ukuhwebelana kwamazwe ase-Afrika, ukugqugquzela ukutshala izimali nokwenza i-Afrika indawo yokuncintisana emhlabeni jikelele embonini yokuvakasha.
Ungqongqoshe womNyango wezokuVakasha uNkk uPatricia de Lille udlulise amazwi okuthakasela idolobha laseThekwini esitatimendeni asithumele kwabezindaba.
“Siyaziqhenya ngokuthi idolobha laseThekwini lizoba ne-Africa’s Travel Indaba ngonyaka ozayo. Lo mcimbi awuwona nje umbukiso wezokuvakasha kodwa ugqugquzela ukukhula komnotho, ukwakha amathuba emisebenzi futhi uyithuba elibalulekile lokubeka i-Afrika endaweni evelele kwezokuvakasha emhlabeni jikelele,” uNkk uDe Lille.
Ukubuya kwe-Africa’s Travel Indaba eThekwini kulindeleke ukuthi kungenise inzuzo enkulu emothweni waleli dolobha nowaKwaZulu-Natali, okubalwa ukunyusa imali esetshenziswa yizivakashi kuleli dolobha, ukudaleka kwemisebenzi, ukutshala imali kwingqalasizinda nasezidingweni ezihlukene.
Le ngqungquthela iletha izinkumbi zabantu abasuke bezokhangisa imikhiqizo yabo, abavakashile, izintatheli nabanye. Ifukula imboni elalisa abantu, eyokuthutha, eyezitolo neyokungcebeleka.
Ingenisa inzuzo yesikhathi eside ngenxa yokwanda kwezivakashi, ukuduma kwedolobha laseThekwini emhlabeni jikelele, ukuheha abadidiyeli bamafilimu nabahleli bemicimbi emikhulu futhi ikhulise umnotho isikhathi eside.
Imeya kaMasipala waseThekwini uMnu uCyril Xaba ithe ukuza kwe-Africa’s Travel Indaba kuleli dolobha eminye iminyaka emihlanu kuzofukula ezokuvakasha futhi kukhombise ukuthi lingabaholi kwezokuvakasha nasekusimamiseni umnotho.
Uthi sebekulindele ukwamukela izivakashi, osomabhizinisi nezinye izinhlaka ezisembonini yokuvakasha.
Ubonga uNkk uDe Lille ngokuseka iTheku namanye amadolobha asuke enze imicimbi ukuze akwazi ukukhulisa imboni yomnotho e-Afrika.