Akungagcini ngokukhulunywa kuloku, asibone nangezenzo, kuloba uBusi Mavuso
UMENGAMELI uCyril Ramaphosa uthembise ukuthi bazochaza ongqongqoshe namaphini abo uma kungenamnyakazo abawenzile ukusukumela izinto eziseqhulwini. Uthe uzohlangana nabo kulezi zinyanga eziyisithupha ezizayo futhi ngeke “amukele zaba nancazelo”.
Loku kuyahambisana nomsebenzi wokuphucula indlela umsebenzi owenziwa ngayo kuhulumeni ukuze ube sezingeni elifanele, okuwumsebenzi omkhulu kodwa okufanele wenziwe uma ubheka indlela isimo esibheda ngayo ezweni lethu.
NgoDisemba umNyango weziSebenzi zikaHulumeni nokuPhatha wakhipha “Uhlaka leZwe oluzolandelwa ukuPhucula ukuSebenza kukaHulumeni” olugqugquzela ukuthi abantu baqashwe ngoba bewazi umsebenzi ukuphucula indlela umsebenzi owenziwa ngayo.
Kuhle impela ukuthi kuqalwe kukhucululwe phezulu kwabaphethe ukuze kuphuculwe indlela umsebenzi owenziwa ngayo ngoba yilokho okuzokwenza kwehlele nasemazingeni aphansi. Uma abantu abaphethe bengabuzwa lutho uma umsebenzi ungenziwe ngeke kube lula ukukwenza lokho kubantu ababaphethe.
Kungashesha futhi kulula ukushintsha ongqongqoshe nabanye abaphathi abaphezulu uma bengawenzi umsebenzi kodwa umsebenzi wokukhuculula nokuphucula umsebenzi kahulumeni wumsebenzi ozothatha isikhathi eside, ikakhulukazi uma kubhekwa indlela izinto ezimapeketwane ngayo komasipala.
Nokho wumsebenzi obaluleke ngendlela emangalisayo ngoba ukungenziwa komsebenzi ngendlela kukhinyabeza umnotho. Okunye wukuthi yonke imizamo yokuletha uguquko eyenziwa uhulumeni ngokubambisana noosmabhizinisi, njengomhlangano osanda kuba khona phakathi kukahulumeni nezikhulu eziphezulu zezinkampani lapho kwakudingidwa khona izinselelo zikagesi, ubugebengu nezokuthutha izoba yize leze uma bengekho abantu abazi umsebenzi eminyangweni kahulumeni abazoqhuba futhi benze izinguquko ezidingekayo endleleni umsebenzi owenziwa nophathwa ngayo.
Izixazululo kuzo zonke lezi zinto zidinga ukuthi wonke umuntu afake isandla, kusukela kohulumeni bezindawo, abezifundazwe neminyango ezweni lonke.
Yize osomabhizinisi bezeseka izinguquko futhi bezikhandla ukusebenzisana nohulumeni ukuze zenzeke kodwa asikwazi ukukhohlwa ukuthi into okufanele siyiphokophele wukuphucula indlela okusetshenzwa ngayo kuhulumeni ukuze ihambisane nale nhloso.
Akusizo nje izinguquko kuphela ezidinga abantu abazi umsebenzi, ngisanda kubhala ngokuthi ibheda kanjani indlela okuhlanganiswe ngayo umgomo wokwethula umshwalense wezempilo ezweni lonke iNational Health Insurance kodwa ngisho ngabe kuthiwa ubuhlanganiswe ngendlela efanele, ubungeke uphumelele uma kungaphuculwa izinga okuhlinzekwa ezempilo kuhulumeni ngayo.
Empeleni enye yezimbangela yokubheda indlela okuhlinzekwa ngayo ezempilo kuhulumeni wukuthi akekho ophendulayo ngokungahambi kahle kwezinto kanjalo nokuthi indlela okuthengwa ngayo izimpahla ayithembekile.
Yiso leso uma ubheka ezemfundo nokubheda kwezinto komasipala. Okumqoka wukuthi abantu abaphendule futhi siyakukhuthaza ukuthi kubuyekezwe indlela umsebenzi owenziwa ngayo. Uma abaphethe phezulu bebuzwa uma umsebenzi bengawenzi ngendlela, loko kuzokwehlela nakubantu abangaphansi kwabo ngendlela emangalisayo.
Sekuyiminyaka uhulumeni uzama ukuyilungisa inkinga. Kwethulwa iziphakamiso ezihlukene okwakuthiwa zizoba yimigomo yokuguqula ukusebenza kukahulumeni, uhulumeni wezindawo, i-National Development Plan, i-Municipal Staff Regulations and Guidelines ne-District Development Model, zonke okwakubhekwe ngazo ukuthi kulungiswe ukungasebenzi kahle kwezinhlaka zikahulumeni.
Azikho nezizodwa esezike zaphasiswa. Osomabhizinisi benza konke okusemandleni ukuqinisekisa ukuthi lesi siphakamiso esisanda kwenziwa sigcina siphasile futhi silandelwe.
Sisebenzisana nohulumeni ezindaweni ezihlukene ukuphucula ukungasebenzi kahle kwezinhlaka zikahulumeni futhi kokunye sifisa kuphuculwe izinhlelo esezivele ziqalile ukulandelwa. Enye yezindawo ezibalulekile wukulandela uhlaka olubheka amakhono okufanele abantu babenawo ukuze bakwazi ukwenza umsebenzi othile. Lokhu kuzokwethula amakhono okufanele izikhulu zikamasipala zibe nawo kanti iBusiness Leadership South Africa (iBLSA) ifisa loku kwenziwe kuzo zonke izinhlaka zikahulumeni nokuqinisekisa ukuthi kufakwa nemisebenzi yezikhulu eziphezulu zemali.
Okunye wukuthi kuqhutshekwe kuqeqeshwe abantu ukuphucula amakhono abo ukuze kuhambisane nokushintsha kwezinto njengokuthi komasipala kudingeka abantu abazokwazi ukwengamela umsebenzi obucayi wokuthola ugesi ozophehlwa yimboni ezimele.
Ezinye izindawo zifaka ukuthi kuhambisane ukuphatha amabhuku, ukuthenga izimpahla nokuphatha ukuze kube sezingeni lamazwe omhlaba, imigomo yemboni ezimele nendlela okubuyekezwa ngayo umsebenzi wabaphethe ukuze kungagcini ngokuthi baphendule uma umsebenzi ungenzekile kuphela kodwa kube khona umvuzo abawutholayo uma umsebenzi bewenze kahle, mhlawumbe bakhokhelwe ibhonasi.
Konke loku kuhambisana nokuphucula indlela okwenziwa ngayo umsebenzi kuhulumeni okunezinhloso zokuqeda inkonhlakalo kuzo zonke izinhlaka zikahulumeni futhi okubhekwe ukuthi kuholele ekutheni abantu baqashwe ngoba umsebenzi bewazi nangenxa yendlela abaziphatha ngayo, hhayi abantu abangathembekile futhi hhayi ngoba kubhekelelwa ezepolitiki kuphela.
Indlela okuhlinzekwa ngayo izidingo zabantu ezweni lonke imapeketwane, ikakhulukazi ngoba ezikhundleni kufakwa abantu abangawazi umsebenzi, isinqumo se-ANC sokufaka abantu bayo ezikhundleni inesandla esikhulu kumonakalo esiwubona ezweni namhlanje.
Indlela yokuphucula indlela umsebenzi owenziwa ngayo kuhulumeni wukukhetha abantu abathembekile futhi abawaziyo umsebenzi abanikwa wona.
Akuyona nje lena into okufanele yenziwe ngoba “kumnandi ukuyenza” kodwa yinto ngisho noMthethosisekelo othi kufanele ilandelwe ukuze umsebenzi kahulumeni wenzeke kahle futhi ubesezingeni elifanele.
- UNksz uMavuso uyisikhulu esiphezulu seBLSA