Kuzobhungwa ngobuchwepheshe nezokuxhumana. INTATHELI YOMBELE iyabika
KUZOBUTHANA ongoti embonini yobuchwepheshe nokuxhumana engqungqutheleni iConnected Africa Summit yesithathu ezoba seMontecasino eGoli, eGauteng, kule nyanga.
Ingqikithi yalo nyaka izobheka ukuthi iyiphi indlela okufanele ziguquke ngayo izinkampani zokuxhumana ngobuchwepheshe ukuze zibe yiloku okudingakalayo ngomuso.
Ezinye zezihloko okuzobhungwa ngazo kule ngqungquthela, ezoba mhla ka-25 kuJulayi, zithinta ingqalasizinda e-wireless njengeVoLTE ne-4G LTE, ukwengamela i-network, i-big data, ulwazi lokucija amabhizinisi, ukugcina ulwazi kwi-cloud, ezokuphepha, i-Internet of Things nobunye ubuchwepheshe obuloku buqhamukile embonini yokuxhumana esebenzisa ubuchwepheshe bamaselula.
I-Connected Africa Summit izohlanganisa izikhulu eziphezulu eziqhamuka ezinkampanini ezihlukene ezisembonini yokuxhumana ngobuchwepheshe, abantu abahlinzeka ngengqalasizinda nezikhulu zikahulumeni ezihlanganisa imithetho elawula imboni.
Ezinye zezikhulumi ezilindelekile yisikhulu esiphezulu seMTN South Africa uMnu uCharles Molapisi, isikhulu esiphezulu seCell C uMnu uJorge Mendes, isikhulu esiphezulu seTelkom Consumer & Small Business uMnu uLunga Siyo, isikhulu esiphezulu se-Association of Comms and Technology uNks uNomvuyiso Batyi, i-chief information security officer eMTN South Africa uNks uCelia Mantshiyane ne-chief risk officer eVodacom uMnu uJohan van Graan ngabanye babantu abazosina bededelana ngalezi zihloko okuzobhungwa ngazo.
Ingqungquthela ihlelwe yi-Accenture kanti abanye babantu abayixhasile yi-Iidentifii, iSKX Protiviti neNexus Group. Umbele ungabanye babaxhasi.
Ngeminye imininingwane, ungangena ku: https://connected-africa.com/summit/