I-Samsa inomshayeli omusha onamava
YINTATHELI YOMBELE
INKAMPANI kahulumeni engamele ukusebenza nokuphepha kwalo lonke ulwandle lwaseNingizimu Afrika iSouth African Maritime Safety Authority (iSamsa) imemezele ukuthi uKapt uDennis Mqadi useyisikhulu esiphezulu sayo.
UMqadi uqale umsebenzi kule nyanga. I-Samsa ithe inethemba lokuthi uzoyihola ngobuqotho njengoba ewumuntu onamava.
UMqadi akayena umafikizolo ekuphatheni kwazise wake waphatha ichweba laseRichards Bay futhi waba nezikhundla ezihlukene eTransnet National Ports Authority kusukela ngo-1997.
Esitatimendeni sayo, iSamsa imchaze njengomholi oqotho, osezakhele igama ngokuqhamuka nezinendlela ezintsha zokusebenza nokuqhakambisa ezokuphepha.
Uneziqu eziningi ezimenza afaneleke ukuhola iSamsa, okubalwa i-Master of Business Administration yaseMilpark Business School, i-Post Graduate Diploma in Leadership yaseNyuvesi yaKwaZulu-Natali ne-National Ports Diploma yaseNorth Kent College e-United Kingdom.
FUNDA NALAPHA: https://www.umbele.co.za/2021/12/03/i-transnet-national-port-authority-isiqoke-abaphathi-bamachweba-abasha-abaqale-ngale-nyanga-e-saldanha-kuqokwe-umnu-ushadrack-tshikalange-emossel-bay-kwaba-wudkt-udineo-mazibuko-ekapa-kwaba-wumnu/
UKhomanda uTsietsi Mokhele owaphatha iSamsa iminyaka eyisishiyagalombili uhalalisele uMqadi. Uthe akangabazi ukuthi uzoyihola kahle le nkampani.
“Siyakuhalalisela Kapt uMqadi. Sinesiqiniseko sokuthi ikusasa lemboni yasolwandle eNingizimu Afrika linekusasa eliqhakazile. Ukungabibikho kwesikhulu esiphezulu eSamsa iminyaka eyishumi kone okuningi. Siyazi uzohola kahle ngoba uyiqonda kabanzi le mboni,” kusho yena.
UMnu uSiyabonga Gama, owayeyisikhulu esiphezulu saseTransnet kodwa manje oseyilungu lePhalamende loMkhonto weSizwe Party, uhalalisele uMqadi, wathi balindele lukhulu kuyena.
“Siyazi ukuthi uzowenza kahle kakhulu umsebenzi omnikwe wona ngenxa yamava, ukuzimisela nobuchule onabo. Silindele ukuthi ubeke iSamsa ezingeni eliphezulu eyayikulona,” kusho yena.
U-Adv uModjadji Difeto naye uhalalisele uMqadi, wathi bayambonga ngeqhaza lakhe lokuqinisekisa ukuthi amachweba aseNingizimu Afrika asebenza ngempumelelo, wamnxusa ukuthi aqhubeke nalowo msebenzi.