Kumenywa abakhokhintela ngophenyo lomkhonyovu kwi-e-filing
INTATHELI YOMBELE
IHHOVISI lomxazululi wezinkinga zentela i-Tax Ombud lizokwenza ucwaningo ngobuqola obenzeke kuma-e-filing profile abakhokhintela.
Lolu wuhlelo lwekhompyutha lweSouth African Revenue Service (iSars) lwemininingwane yabakhokhintela.
Loku kwenzeka ngemva kokuthi iHhovisi lomXazululi weziNkinga zeNtela licele imvume yokuphenya udaba lokugetshengwa kwama-profile kwi-e-filing yeSars.
Mhlaka-15 wango-Agasti leli hhovisi labhalela ungqongqoshe womNyango weziMali licela imvume yokuphenya ngezinkinga zobuchwepheshe nezinye izinkinga ezithinta i-e-filing ukusiza abantu abantshontshelwa ama-profile abo ngokwesigaba 16 (1)(b) se-Tax Administration Act, 28 yango-2011.
Kulandela izikhalo nemibuzo etholwe yihhovisi lika-Tax Ombud evela kubakhokhintela, abantu abasemkhakheni wentela neminye evele ezithangamini zokucobelelana ngolwazi neSARS nezinye izinhlaka ezithintekayo mhlaka-13 wangoJuni ngonyaka odlule.
Ihhovisi licela abakhokhintela nababamele ukuthi babeyingxenye yocwaningo ngalobu buqola. Inhloso yocwaningo wukuqoqa imininingwane ezosiza ihhovisi lomxazululi ophenyweni nokuhlanganisa umbiko.
Ukubayingxenye yocwaningo, ungangena ku: https://forms.office.com/r/8bA3VDixPZ. Uma ungathandi ukwenza ucwaningo ngale ndlela yobuchwepheshe, ungangena lapha https://www.taxombud.gov.za/wp-content/uploads/2025/02/efiling-profile-hijacking-survey.pdf
ukuthola ifomu ozoligcwalisa. Uma usuqedile ukugcwalisa ifomu, lithumele ku: communications@taxombud.gov.za.
Ucwaningo luyatholakala nakwi-website ye-Tax Ombud ngokungena ku: www.taxombud.gov.za.
Ucwaningo luvalwa mhlaka-5 wangoMashi.