Abasafufusa abasukumele imicikilisho yeSABS ukuze bezokhula. UTEBOGO MOKWENA uyabika
KUNINGI okungatholwa wosomabhizinisi abasafufusa ophikweni olwengamele ukuhlola nokuqinisekisa imikhiqizo iSouth African Bureau of Standards (iSABS). Kepha wonke usomabhizinisi ofisa ukuhlomula kulolu phiko kudingeka abe namakhasimende amaningi ebhizinisini lakhe.
UMnu uDumisani Mngadi, imenenja yeSABS SMME, uthe zikhona nezinye izinhlelo abazihlelele osomabhizinisi abancane nabangakabi nayo imali namandla okufukula amabhizinisi.
Ekhuluma emcimbini obuhlelwe yiSmall Enterprise Development Agency, i-The Role of Conformity Assessment in South Africa, uMngadi ucebise osomabhizinisi abasafufusa ukuthi bazibandakanye ezinhlanganweni ezinjengeSABS ukuze bafukuleke.
“Uma usomabhizinisi osafufusa esazi ukuthi kudingekani ukuze abe sezingeni elilungele konke okudingekayo, kuba lula ukuthi kube khona okwenziwayo ukuze afukuleke kubhekwe phambili.
“Esinye sezizathu ezenza osomabhizinisi abasafufusa ukuthi bahluleke wukwenza loku wukuthi amabhizinisi abo abawaphathi ngendlela efanele, kokunye uthola ukuthi abazi nokuthi yini okudingeka bayenze ukuze bafeze okudingekayo.
“Ukwenza isibonelo nje, indaba yezibulalimagciwane. Njengosomabhizinisi kufanele kuvele ukuthi usebenzisa hloboluni lwaso futhi kudingeka ukwazi ukuveza imininingwane efana nekheli lendawo ekhiqiza imikhiqizo oyidayisayo, igama lenkampani yakho, izinombolo ezifakazela ukubhaliswa kwenkampani nosuku lokuphela kwesikhathi sazo,” kuchaza yena.
Uqhube wathi ukuhambisa imininingwane yebhizinisi lakho eSABS kuphinde kusize ukuqinisekisa ukuthi imikhiqizo yakho ayinabungozi yini kubathengi.
“Ukucacisa loku nje, kuyenzeka kwesinye isikhathi uthole ukuthi izimoto ezisetshenziwa ebhizinisini aziphephile ukuthi zingasetshenziwa kodwa ngoba akekho owayekhona ukuzihlola, kugcine kuholela ekutheni kulimale abantu. I-SABS ikhonela ukulungisa izinto ezinjalo,” kuqhuba uMngadi.
Uthi isitifiketi seSABS kudingeka sibuyekezwe njalo emva kweminyaka emithathu. Uqinisekise ukuthi beyiSABS bazokuqikelela ukuthi bayaqhubeka nokucebisa osomabhizinisi ngemigomo okumele bayilandele ekuphatheni amabhizinisi.
“Sinezinhlelo zokucebisa osomabhizinisi ngokumele bakwenze ukuqikelela ukuthi bayigcina yonke imigomo yeSABS, sibanike nezitifiketi ngokwenza loko. Asigcini lapho kodwa siphinde sibaseke ukuze badlondlobale kwezamabhizinisi.
“Nezitifiketi esibanika zona ziba wusizo kakhulu kubona ngoba zenza babesethubeni elihle lokuthola amathuba, kwande amakhasimende ngoba amabhizinisi abo asuke esethembeke ngokuphelele ebantwini,” usho kanje.
- Lolu daba luqale lwashicilelwa ku: www.vutivibusiness.co.za