Ungomunye wabaholi bamabhizinisi abahlonishwayo eNingizimu Afrika njengoba ehlale elwela abantu abamnyama nabesifazane. Uxoxe noSLINDILE KHANYILE ngokungaxazulula inkinga yokuntuleka kwemisebenzi nokunye

NGENKATHI enza unyaka wesine ezifundweni zobudokotela, kwathi ngelinye ilanga esendleni elalele umsakazo wezwa umuntu omnyama ekhuluma, wachazeka yindlela ayeyibeka ngayo indaba yakhe nendlela ayekhipha ngayo isiNgisi ngamakhala. 

Kwathi ukuba ezwe ukuthi wenza msebenzi muni lowo muntu ayemlalele, wanquma ngaleso sikhathi ukuyeka ukufundela ukuba wudokotela ngoba esefuna ukulandela lowo mkhakha ayesezwe ngawo.  

Lwaqala kanjalo-ke uhambo lukaSolwazi uBonang Mohale lokungena ekuphatheni amabhizinisi. Namhlanje uwusihlalo weBhodi laseBidvest neSBV Services kanti futhi ukhona nasemabhodini akwaRMB neSwiss Re Africa.

“Emva kweminyaka emine (ngifundela ubudokotela) ngezwa umAfrika omuhle, uLot Maduke Ndlovu ongasekho. Ngangisendleleni ngiya eWitbank ngizwa kuxoxwa naye emsakazweni. Ngathi yo, umuntu omnyama ohlakaniphe kangaka… okhuluma kahle kanje… okhipha isiNgisi ngamakhala. Ngase ngithola ukuthi uyimenenja, ngase ngithi nami ngifuna ukuba yimenenja. Ngabaleka esikoleni sokufundela ubudokotela ngoba ngifuna ukuba yimenenja… Ngenhlanhla ngigcine ngiyiyona imenenja,” kulanda yena.

UMohale, oneminyaka ewu-59, usathatha umhlaphansi ekusebenzeni ngokugcwele. Uphathe izinkampani eqashiwe nalezo azisungulile emikhakheni enhlobonhlobo njengoba esebenze kwezempilo, ezamabhanoyi, ezokuhlinzeka ngemali, ezikawoyela nezinye. 

Emikhakheni wezempilo usebenze iminyaka ewu-11, lapho esebenzele khona izinkampani ezikhiqiza imithi zaphesheya ezifana nePfizer, iSandoz, iNorvatis, egxile kakhulu ekudayiseni nasekukhangiseni ngemikhiqizo yazo, nagcina esewumphathi kwezinye zazo. 

“Ngoba lezi kwakuyizinsuku zobumnyama bobandlululo, iningi labantu abamnyama lalibonwa kodwa lingalalelwa; ngakho kwakunzima ngoba kwakumele sitshengise ukuthi siwulungele umsebenzi, hhayi nje zonke izinsuku kodwa ihora nehora. Izinkampani zabelungu ngaleso sikhathi zazicwasa ngokwebala nangokobulili, abantu abamnyama babeyizisebenzi bese kuthi izimenenja kube ngabelungu. Babeholela abelungu ngaphezu kwabantu abamnyama,” kukhumbula uMohale.

“Izifundo engazifunda (kuloko) wukuthi ukuzikhandla, ukuzimisela nokuphokophela nokucophelela kuhlale kudingwa yiwo wonke umuntu; yingakho ngakwazi ukugcina ngifinyelele kwibhodi kuleyo minyaka ewu-11.”

UMohale uthi wabona futhi ukuthi angaletha uguquko uma eba yisikhulu esiphezulu ngokuqikelela ukuqasha abantu abazolusebenzela uguquko, bavikele intando yabantu futhi balwele ubulungiswa kwezenhlalakahle.

Nakuba afika emsebenzini wahlangabezana nezingqinamba kodwa akazange ayeke ukuphokophela iphupho lakhe lokuba yimenenja. Uthi enye into eyayimkhuthaza wukusaba ukuhlupheka kanjalo nokuqonda ukuthi wayesengazuza okukhulu kunaloku ayevele esekuzuzile.

“Okwesithathu, ngangazi ukuthi ukuphatha akunasimanga kuphela nje ngidinga ukunikwa ithuba nokungakho ngangenza izifundo zokukhangisa ngibe ngisebenza ngaze ngafinyelela ezingeni lokuba yi-chartered marketer, uze ubhale izivivinyo zebhodi. Loko ngakwenza ngazi nokuthi akekho umuntu owake wabulawa wukuzikhandla.” 

UMohale uzalelwe futhi wakhulela eKatlehong, eGauteng, lapho ekhuliswe khona kakhulu wuninakhulu. Uthi ushintshe imisebenzi nezimboni uma kuvela amathuba angcono ngoba enye into wayazi ukuthi kumele alekelele nasekhaya.

“Kwakunenqwaba yabantu okwakumele ngibabhekelele njengabo bonke abantu abamnyama, abazali, izingane zakithi kanjalo nokwazi ukuthi imigomo yokuphatha iyafana noma ngabe udayisa amakheshi, ezokuhlinzeka ngemali, imithi nokunye.”

Emasontweni amathathu edlule iStatistics South Africa ikhiphe izibalo ezintsha ezikhombisa ukuthi isibalo sabantu abangasebenzi eNingizimu Afrika sesifinyelele ku-32.5%. Intsha emnyama engasebenzi ingaphezu kuka-55% bese kuthi abesifazane abamnyama bona bawu-38.5%. 

Ziningi izisombululo eziyaye ziphakanyiswe uma kukhulunywa ngokuntuleka kwemisebenzi, ikakhulukazi entsheni. UMohale uthi sisodwa isisombululo.  

“Kumele thina sisungule amabhizinisi ethu ukuze sizoqasha izingane zethu ngoba kuwumsangano ukulokhu sizala izingane bese sizithumela kwezinye izindawo ukuthi ziyoguqa phansi ngedolo zicele umsebenzi komunye umuntu kube kuwumsebenzi wethu ukweseka izingane zethu.

“Mhlazane izingane zethu zisibuza ukuthi uRolihlahla Nelson Mandela wayilwela waze wayithola le nkululeko, niyenzeni nina, singabi novalo lokuthi ziyosilahla. Ogogo bethu babethi umbuzo okufanele uhlale uzibuza wona empilweni owokuthi ‘yini oyenzela abanye abantu?’”

Nakuba evuma ukuthi indlela izinto eziyiyona ezweni azibavuni abafisa ukusungula futhi bakhulise amabhizinisi kodwa uthi loko akusho ukuthi akumele asungulwe.

“Uma singasheshe sikwamukele ukuthi ukusungula ibhizinisi kunzima nokuthi akukho ezandleni zikahulumeni noma zamathenda… amathenda akuwona amabhizinisi nokuthi ukube bekulula wonke umuntu ubezokwenza. Yiko kanye lobo bunzima obenza kube kuhle. Siyoqala amabhizinisi ethu, hhayi sisacabanga njengomphakathi… hhayi sisacabanga njenge-African National Congress… cha. Uyoliqala ibhizinisi uma ucabanga ukuthi uwubaba ohlalelwe wukukhulisa amadodakazi akhe amabili endaweni ephephile futhi ubakhele umnotho oyobaphilisa izizukulwane ngezizukulwane. Mhlazane waqonda loko, akukho okuyokuvimba ukuthi usungule ibhizinisi,” kucebisa yena.

UMohale, oke waba yisikhulu esiphezulu seBusiness Leadership South Africa, uthi uhlale ethola ugqozi ebantwini abathi bebhekene nobunzima kodwa baphokophele baze baphumelele.

“Ngoba uma uwumuntu omnyama ukwazi ukuphumelela eNingizimu Afrika lapho kwakukhona imithetho ewu-109 eyayishayelwe ukukucindizela nokukuvalela ngaphandle kusho ukuthi ungaphumelela noma yikuphi.” 

Uthi into embusa kakhulu endleleni ahola ngayo wukufisa ukubona indlela enza ngayo isiza abanye abantu ukuthi nabo bakhuphuke bagcine sebengcono ngoba ukholwa wukuthi abantu banikwa amathuba okuhola ukuze bezolekelela abanye hhayi ukuthi bazicebise nokungakho nesihloko sencwadi yakhe sithi Lift As You Rise.

UMohale uganiwe futhi unamadodakazi amabili. 

Okunye ngaye:  

• UwuShansela weNyuvesi yaseFree State;
• UwuSolwazi eJohannesburg Business School, eCollege of Business and Economics;
• Uke waba wusihlalo weShell SA;
• Ezinye izinkampani azisebenzele yi-Otis Elevators, i-SAA, iSanlam neDrake & Scull Intergrated Facilities;
• Wake waba wumengameli weBlack Management Forum;
• Emiklomelweni aseke wayiwola kubalwa i-Free Market Foundation Luminary Award ngo-2019, i-BMF Lifetime Achievement Award ngo-2019, i-IPM CEO of the Year ngo-2012, i-SA Facilities Management Association Personality of the Year ngo-2007 neminye eminingi;
• Uphumula ngokuya kwi-picnic nomndeni wakhe, badlale i-scrabble, ukugijima nokudlala igalofu;
• Uthanda konke ukudla kwesiNtu kanti nokosa isiklabhu, inkukhu nofishi ukukhonzile.